Намазын үед сүүрэ, айатуудыг Мусхаф дахь дарааллаар уншихын шариатын шийд юу вэ?

Сүннэтэд нийцэх нь намазын үед уншигдах айат, сүүрэ, Мусхаф дахь дарааллаар нь унших явдал юм. Нэг сүүрэ эсвэл айатыг уншсаны дараа өмнөх сүүрэ эсвэл айатыг унших нь тензихэн макрух гэж тооцогдоно. Гэвч энэ нь намазыг хүчингүй болгох, эсвэл сахивийн сажда хийхийг шаардсан асуудал биш юм. (Ибн Абидин, Раддул-мухтар, 1/546) Энд яригдаж буй дараалал нь угтаа намазын бус, тиловатын шаардлага юм. Энэ асуудал нь сүүрэ, айатуудын дарааллыг хүмүүс биш, харин Пайгамбар (с.а.с.) өөрөө тогтоосон гэсэн үзэлд тулгуурладаг. Сүүрэн доторх айатуудын дараалал нь тевкифи (бөгөөд өөрчлөгдөхгүй) гэдэг дээр Исламын эрдэмтэд санал нэгтэй. Гэхдээ сүүрэн хоорондын дараалал тевкифи эсэх дээр санал нэг биш байдаг. Иймээс намазын үед сүүрэ, айатуудыг дарааллаар нь унших тухайд янз бүрийн үзэл бодол гарсан. Ханафи мазхабт айат болон сүүрэн хооронд дарааллыг баримтлан уншихыг зохистой гэж үздэг. Пайгамбар (с.а.с.) нэгэн шөнө намазын үед дараалал баримтлалгүйгээр эхлээд Ниса сүүрэ, дараа нь Али Имран сүүрийг уншсан тохиолдол нь сүүрэн хоорондын дараалал хараахан тогтоогдоогүй байхад болсон явдал гэж тайлбарладаг. (Навеви, Шарх Муслим, 6/61-62)

Намазын үед уншихдаа дараагийн хэсэг рүү шилжихдээ дунд нь ганцхан сүүрэ эсвэл айатыг алгасах нь мөн тензихэн макрух гэж тооцогддог. Дараагийн ракъатад цааш унших бол хамгийн багадаа хоёр айат эсвэл хоёр сүүрэ алгасаж унших нь зохистой.

Зарим эрдэмтэд дарааллыг баримтлахгүй байх нь зөвхөн фарз намазуудад тензихэн макрух бөгөөд, нафил намазуудад макрух биш гэж үздэг. (Ибн Абидин, Раддул-мухтар, 1/546) Харин эсрэг байр суурьтай хүмүүс дараахыг нотолгоо болгодог: Пайгамбар (с.а.с.) Билал (р.а.)-ыг намазын үед нэг сүүрээс нөгөө рүү алгасаж уншиж байгааг сонсоод түүнд “Сүүрэнг яг байгаа чигээр нь унш” (Ибн Аби Шайба, аль-Мусаннаф, 2/264 [8818], 6/151 [30259]) гэж хэлсэн байна.

Дүгнэж хэлэхэд, намазын үед сүүрэ, айатуудын дарааллыг баримтлахгүй байх нь тензихэн макрух бөгөөд энэ нь намазыг хүчингүй болгох, дахин унших шаардлагатай болгох хэмжээний дутагдал биш юм.

Эх сурвалж: T.C. Diyanet İşleri Başkanlığı, Din İşleri Yüksek Kurulu