Салауат хэлэхийн утга учир юу вэ?

Аллах Таала "Ахзаб" сүргийн 56-р аятад: "Үнэхээр Аллах болон Түүний тэнгэрэлч нар нь Элчид салауат хэлдэг (Аллахаас – өршөөл, тэнгэрэлчдээс – ивээл, залбирал). Итгэл үнэмшилтэй хүмүүс ээ! Та нар ч бас Түүнд (Элчид) салауат болон энх тайван хүсээрэй!" гэжээ. Аллах Таала Өөрийн агуу их сүр хүчээр, тоо томшгүй олон тэнгэрэлч нарын Пайгамбарт (түүнд Аллахын салауат ба энх амгалан байг) салауат хэлдэгийн, мөн итгэл үнэмшилтэй хүмүүст ч салауат хэлэхийг тушаасны нууц нь юу вэ?

Нэгдүгээрт, Пайгамбарыг (түүнд Аллахын салауат ба энх амгалан байг) магтаж, Аллахын өмнөх нэр төрийг нь өргөж, онцгой эрхэм чанарыг нь харуулах, мөн түүний шашныг бусад шашнаас дээгүүр болгох явдал юм. Аллах Таала "Сафф" сүргийн 8-р аятад: "Тэд (тэр буруу хүмүүс) Аллахын гэрлийг амаараа (хэлээрээ) унтраахыг хүснэ. Гэвч Аллах үл итгэгчид дургүй байсан ч, Өөрийн гэрлийг бүрэн гүйцээх болно" гэжээ.

Хоёрдугаарт, хэр удаан хугацаа өнгөрсөн ч Пайгамбарын нэр, байр суурь хүмүүсийн дунд өндөр байхын тулд. Аллах Таала "Шарх" сүргийн 4-р аятад: "Бид чиний дурсамж, нэрийг өндөрт өргөсөн биш үү?" гэжээ.

Гуравдугаарт, бидний хэлсэн салауат, энх амгалан Пайгамбарт хүрдэг. Пайгамбар (түүнд Аллахын салауат ба энх амгалан байг) нэг хадист: "Өдрүүдийн хамгийн эрхэм нь Баасан өдөр. Энэ өдөр Адам аав маань бүтээгдсэн, мөн энэ өдөр нас барсан. Мөн сүүлчийн өдөр ч Баасан өдөр тохионо. Баасан өдөр надад салауат хэлэхийг олшруулаарай. Учир нь та нарын салауат надад хүрдэг" гэжээ.

Дөрөвдүгээрт, хэн Пайгамбарт салауат хэлбэл, Аллах тэр хүнд салауат хэлдэг. Хэн Пайгамбарт энх амгалан хүсвэл, Аллах тэр хүнд энх амгалан илгээдэг. Хадист: "Нэг өдөр Аллахын элчийн царайд баяр баясгалан илэрчээ. Тэр үед сахабууд нь: 'Аллахын элч ээ! Таны царайд баяр харагдаж байна' гэжээ. Тэгэхэд Пайгамбар (түүнд Аллахын салауат ба энх амгалан байг): 'Надад тэнгэрэлч ирээд: "Мухаммад аа! Таны үмбэтээс хэн нэгэн танд нэг удаа салауат хэлбэл, Би түүнд арван салауат хэлнэ. Үмбэтээс хэн нэгэн танд нэг удаа энх амгалан хүсвэл, Би түүнд арван энх амгалан илгээнэ. Үүнд та сэтгэл хангалуун байна уу?" гэжээ. Би: "Мэдээж, сэтгэл хангалуун байна" гэж хариулсан' гэжээ.

Тавдугаарт, Аллах Таала Пайгамбарт салауат хэлсэн хүний алдааг уучилж, байр суурийг нь өргөдөг. Хадист: "Хэн надад нэг удаа салауат хэлбэл, Аллах түүнд арван салауат хэлж, түүний арван алдааг уучилж, байр суурийг нь арван дахин өргөнө" гэжээ. Пайгамбарт (түүнд Аллахын салауат ба энх амгалан байг) салауат хэлэх нь бидний мэдэх, мэдэхгүй олон давуу талтай. Тиймээс ямар ч үед салауат хэлэхийг олшруулах нь мустахаб үйл юм.

Салауат хэлэх олон төрөл бий. Дээрх аят буусны дараа нэг хүн Пайгамбарт (түүнд Аллахын салауат ба энх амгалан байг) ирээд: "Аллахын элч ээ! Танд салауатыг хэрхэн хэлэх вэ?" гэж асуухад, тэр салауатыг ингэж хэлсэн: «Аллаһуммә солли алә Мухәммәд, уә ғалә әәли Мухаммәд, кәмә солләйтә ғалә Ибраһим иннәкә хамидум мәжид. Уа бәрик ғалә Мухаммәд уа ғалә әәли Мухаммәд, кәмә бәәрәктә ғалә Ибраһим иннәкә хамидум мәжид».

Пайгамбар (түүнд Аллахын салауат ба энх амгалан байг) бидний салауатад хэрэгцээтэй биш, харин салауат хэлэх нь бидэнд хэрэгтэй. Учир нь Пайгамбарт салауат хэлснээр хүн буянд хүрнэ. Аллах тэр хүнд өршөөлөө хайрлаж, нүглийг нь уучилж, байр суурийг нь өргөж, уйтгар гунигийг нь тайлж, амьжиргааг нь нэмэгдүүлнэ. Салауатаар эхэлж, салауатаар дууссан залбирал хүлээн зөвшөөрөгддөг. Салауат хэлснээр хүн сүүлчийн өдөр Аллахын элчид (түүнд Аллахын салауат ба энх амгалан байг) хамгийн ойр хүмүүсийн нэг болдог. Хадист: "Сүүлчийн өдөр надад хамгийн ойр байх хүн бол надад хамгийн их салауат хэлсэн хүн" гэжээ. Манай эрдэмтдийн хэлснээр, Пайгамбар бол хүн төрөлхтний эрхэм, Баасан бол өдрүүдийн ноён. Тиймээс Баасан өдөр хэлсэн салауатын буян бусад өдрүүдийнхээс илүү байдаг. Аллах Таала бид бүгдийг Пайгамбарт (түүнд Аллахын салауат ба энх амгалан байг) салауат хэлдэг, Сүүлчийн өдөр Аллахын элчид хамгийн ойр байх хүмүүсийн эгнээнд оруулж болтугай! Амин!

Медет КУРСАКОВ,

"Иман" сэтгүүл, №9, 2023 он