Шувууг торонд тэжээж болох уу?

Зарим амьтан, шувууд төрөлхийн өнгө зүс, дуу хоолой зэрэг шинжээрээ гоо үзэсгэлэнтэй байдаг. Хүн бүр гоо үзэсгэлэн, сайхныг таашаадаг нь Аллах Тааллагийн нигүүлсэл бөгөөд үүнд талархах ёстой.

Аллах Таала Куран дээр ингэж айлдсан байна:

قُلْ مَنْ حَرَّمَ زِينَةَ اللهِ الَّتي أَخْرَجَ لِعِبَادِه وَالطَّيِّبَاتِ مِن الرِّزْقِ

«(Эй Элч!) “Аллах Өөрийн боолууддаа гаргаж өгсөн гоёл чимэг болон сайн хүнсийг хэн хориглосон юм бэ?” гэж хэл» [1] .

والْخَيْلَ والْبِغَالَ والْحَمِيرَ لِتَرْكَبُوهَا وَزِينَةً

«Мөн морь, луус, илжигийг унаж, бас гоёл чимэг болгон (зохиосон)» [2] .

Имам Куртуби: «Гоёл чимэглэл болгон хэрэглэж буй бүхий л зүйл шариатаар хориглогдоогүй бол макрух биш. Харин шариатаар хориглосон зүйл байгаа бол, эсвэл рия [3] зорилготой бол хориглоно» [4] гэжээ.

Энэ талаар олонхи уламжлалт эрх зүйн сургууль (Ханафи, Малик, Шафи) шувууг торонд тэжээх, мөн шариатын хүрээнээс хэтрэхгүйгээр худалдаалахыг зөвшөөрсөн байдаг [5] .

Үүний баталгаа болгож, Элч (Аллахын энх амгалан, ерөөл түүнд байх болтугай):

«Эй Абу Умайр! Нуғайр [6] юу хийж байна?» [7] гэсэн хадисийг иш татдаг.

Ибн Хажар: «Энэ хадис нь шувууг торонд тэжээж болохыг харуулж байна» [8] гэжээ.

Гэвч шувууг торонд тэжээхийг зөвшөөрөхийн тулд дараах нөхцлүүдийг хангах ёстой:

• Онгироо, бардам зангаас зайлсхийх;

• Шувуу тэжээх нь ибадатад саад болохгүй байх;

• Тэжээлийн хувьд үрэлгэн зан гаргахгүй байх;

• Цаг тухайд нь хооллож байх. Учир нь Элч (Аллахын энх амгалан, ерөөл түүнд байх болтугай):

  «Нэг эмэгтэй муурыг хорьж, хоол унд өгөөгүй, газар дээрх шавьж идэхийг ч зөвшөөрөөгүйгээс болж үхүүлсэн тул шийтгэгдэж, тамд орсон» [9] гэж өгүүлсэн.

• Шувууг тэжээх нь тарчлаах, хор хөнөөл учруулах хэлбэрт хүрэх ёсгүй.

Иймд дээрх нөхцлүүдийг хангаж байвал шувууг торонд тэжээж болно. Гэхдээ хосоос нь салгаж, ганцааранг нь хорихгүй, махчин шувуутай хамт байлгахгүй байх нь зүйтэй.

Шариат ба фатвагийн хэлтэс

[1] «Аъраф» сүрэг, 32-р аят.

[2] «Нахль» сүрэг, 8-р аят.

[3] Аллахын таалалд бус, хүмүүст харуулах, гайхуулах зорилгоор хийсэн үйлдэл.

[4] Тафсир аль-Куртуби, 7/97.

[5] Хашият Ибн Абидин, 6/401. Мавахиб аль-Жалил, 3/222. Мугни аль-Мухтаж, 4/208.

[6] Бялзуухайтай төстэй, улаан хошуутай жижиг шувуу. Зарим нь булбул гэж үздэг.

[7] Бухари, №5778. Муслим, №2150.

[8] Фатх аль-Барий, 10/586.

[9] Бухари, №3295. Муслим, №2242.