ТИК-ТОК ХИЙХ НЬ ЗӨВ ҮҮ?

Тик-Ток гарч ирээд удаагүй ч өнөөдөр энэ аппликейшн дэлхий даяар маш хурдтай тархсан. Хэрэглэгчдийн тоогоороо Юүтүб, Инстаграм, Фэйсбүүкээс ч давж гарсан. Өнөөгийн залуусын гол тренд бол энэ юм.

Манай улсад ч Тик-Ток хэрэглэгчдийн тоо өдөр ирэх тусам нэмэгдэж байна. Тик-Ток дээр хэрэглэгчид бэлэн аудио ашиглан богино хэмжээний бичлэг хийдэг. Ихэвчлэн залуус зугаацах зорилгоор ашигладаг.

Тик-Ток дээр ихэвчлэн задгай хувцастай охид бүжиглэж, залуус зохисгүй үйлдэл гаргаж, бусдыг шоолж, дооглодог нь үнэн. Зарим нь Кораныг, алдартай хүмүүсийг элэглэсэн бичлэг ч гарч байсан. Юу зөв, юу буруу гэдгийг ялгаж чадахгүй хүүхдүүд тэдний үйлдлийг дуурайж, муу зуршилд автах нь бий. Гэхдээ зарим нь чухал сэдвээр бичлэг хийдэг нь ч бий.

Ислам шашин орчин үеийн технологи, шинэ зүйлийг, тэр дундаа интернетийг ашиглахыг зөвшөөрдөг. Гэхдээ энэ нь шариатын хүрээнд байх ёстой. Тиймээс интернетээр бусадтай харилцахдаа мусульман хүн зөвхөн шариатаар зөвшөөрөгдсөн зүйлсийг хийж, хориглосон зүйлээс зайлсхийх хэрэгтэй.

Аллах Таала: «Иймд итгэгчид ээ! Аллахыг зохих ёсоор нь хүндэлж, Түүнд осолгүйгээр захирагдаж, (үг, үйлдэл нь зөв, Аллахад амласан амлалтаа сахидаг) үнэнч хүмүүстэй хамт бай» гэж айлдсан («Тәубе» сүрэг, 119-р аят).

Элч пророк маань (түүнд Аллахын энэрэл, амар амгалан байг): «Хаана ч байсан Аллахаас эмээж, муу үйлдлийн дараа сайн үйл хий. Энэ сайн үйл нь мууг арилгана. Хүмүүстэй сайхан зангаар харьц!» – гэсэн (Тирмизи).

Интернэт хэрэглэж буй хүн юуны өмнө зөв санаатай байх ёстой. Тақуа, сайн үйл хийдэг, сайхан ааштай байх хэрэгтэй. Ашиггүй, утгагүй зүйлээс хол байх нь чухал. Цагаа дэмий үрэлгүй, Аллахын өгсөн амьдралаа үнэлж, зөв ашиглах ёстой, амьдралынхаа мөч бүрийн төлөө хариуцлага хүлээхээ мартаж болохгүй. Мөн мусульман хүний цаг, хүч, оюун ухаан, анхаарал зөвхөн хэрэгтэй зүйлд зориулагдах ёстой.

Элч пророк маань (түүнд Аллахын энэрэл, амар амгалан байг): «Өөртөө ашигтай зүйлд тэмүүлж, Аллахаас тусламж гуй!» – гэсэн (Муслим).

Мөн интернетээр худал мэдээлэл, зураг, бичлэг тараахгүй байх, бусдыг хуурахгүй байх шаардлагатай. Хэн нэгнийг доромжлох, шоолохыг хориглодог. Олон нийтийг инээлгэхийн тулд худал ярих нь шашинд таашаагддаггүй.

Элч пророк маань (түүнд Аллахын энэрэл, амар амгалан байг): «Инээлгэхийн тулд огт болоогүй зүйлийг зохиож ярьдаг хүмүүс ямар азгүй вэ, ямар азгүй вэ, ямар азгүй вэ!» – гэж анхааруулсан (Әбу Дәуіт).

Намба, ичих, нэр төрийн асуудалд онцгой анхаарах хэрэгтэй. Учир нь үүнд хайхрамжгүй хандах нь нийгэмд олон асуудлын эх үүсвэр болдог. Гэр бүлийн маргаан, салалт, ёс бус болон өдөөн хатгалга үүнтэй холбоотой.

Коран дээр: «Итгэгчдийн дунд ёс бус явдал дэлгэрээсэй гэж хүсэгчдэд энэ хорвоо болон нөгөө ертөнцөд маш хүнд шийтгэл бий» гэжээ («Нұр» сүрэг, 19-р аят).

Тиймээс Тик-Ток дээр утгагүй, ёс зүйгүй, ичгүүргүй бичлэг хийх, тийм бичлэг үзэх, мөн энэ сүлжээнд дэмий цагаа үрэх нь – харам. Мусульман хүн ийм үйлдлээс аль болох зайлсхийх ёстой.

Хасан АМАНҚҰЛ,

«Мунара» сонин, №23, 2020 он