Загасыг цахилгаан гүйдлээр барихыг зөвшөөрдөг үү?

Аллах Таала Куран сударт усны амьтдын талаар ингэж айлдсан байна:

أُحِلَّ لَكُمْ صَيْدُ الْبَحْرِ وَطَعَامُهُ مَتَاعًا لَكُمْ وَلِلسَّيَّارَةِ

«(Эй, итгэгчид!) Та нар болон аялагчдад хэрэглэхийн тулд далайн амьтан, хоол хүнсийг та нарт халал болголоо» .

Аллахын Элч (түүнд Аллахын энх амгалан, ерөөл нь оршиг) хэлсэн нь: «Далайн ус цэвэр, түүний сэг зэм нь ч бас зөвшөөрөгдсөн» [1] , – гэжээ.

Ханафи мазхабын эрдэмтэд Куран ба суннад дурдсан «усны амьтан» гэдгийг загасны төрөлд хамаарах амьтад гэж тайлбарладаг. Өөрөөр хэлбэл, өөрөө үхээд усны мандалд хөвж гарсан загаснаас бусад бүх төрлийн загасыг, амьд ч бай, үхсэн ч бай идэхийг зөвшөөрдөг.

Ер нь загас барих хэд хэдэн арга бий. Зарим нь шариатын шаардлагад нийцдэг бол зарим нь нийцдэггүй. Тиймээс загасчин хүн шариатын зөвшөөрсөн аргаар загас барих ёстой. Өөрөөр хэлбэл, Аллахын өгсөн нигүүлслийг нүгэлтэй аргаар олж авах нь зохисгүй. Аллах Таала Куран сударт:

كُلُوا وَاشْرَبُوا مِنْ رِزْقِ اللهِ وَلَا تَعْثَوْا فِي الْأَرْضِ مُفْسِدِينَ

«Аллахын өгсөн амьжиргаанаас идэж, уу, харин дэлхий дээр үймээн самуун бүү тарь» [2] .

Сүүлийн үед дэлгэрч буй загас барих нэг арга бол цахилгаан гүйдэл ашиглах явдал юм. Хүчдэл ихсэхэд загас үхэж, усны мандалд гарч ирнэ, харин хүчдэл бага бол загасыг үхүүлдэггүй ч мансуурч, хөдөлж чадахгүй болгодог. Ингэснээр загас усны мандалд гарч, барихад амархан болдог.

Загасыг цахилгаан гүйдлээр барих нь дараах сөрөг үр дагавартай:

• Загасыг тарчлаан, зовоож алах. Ислам бол энэрэл нигүүлслийн шашин тул ийм үйлдэл шариатын шаардлагад нийцэхгүй. Амьтныг нядлахдаа ч зөөлөн, зөв аргаар хийхийг тушаасан. Аллахын Элч: «Аллах Таала бүхнийг сайтар хийхийг тушаасан. Тиймээс мал нядлах бол зөв нядал, хутгаа урьдчилан хурцал, амьтныг зовоож болохгүй» [3] , гэжээ.

• Гол, нуурын экосистемд өнөө ба ирээдүйд хор хохирол учруулж, загасны нөөцийг багасгана. Цахилгаан гүйдлээр барихад том, жижиг загас, түрс, усны ургамал, өт зэрэг бүх амьтан үхдэг. Амьд үлдсэн загас ч түрсээ гаргаж чадахгүй болдог. Хадист:

لَا ضَرَرَ وَلَا ضِرَارَ

«Өөртөө ч, өрөөлд ч хор хохирол учруулах ёсгүй» [4] , гэжээ.

Дүгнэж хэлэхэд, цахилгаан гүйдлээр барьсан загасыг идэхийг зөвшөөрдөг ч, усны экосистемийг сүйтгэх аюултай тул ийм аргаар загас барихыг зөвшөөрдөггүй [5] .

Шариат ба фатвагийн хэлтэс

• [1] Тирмизи, Абу Дауд.

• [2] Бакарa сүрэ, 60-р аят.

• [3] Имам Муслим.

• [4] Имам Ахмад.

• [5] https://www.dar-alifta.org/ar/ViewFatwa.aspx?ID=13266&LangID=1&