Залбирын дараа ташриқ тәкбир хэлэх ёстой юу?

Аллах Таала Куранд:

«Тодорхой хоногуудад (фарз залбирлын дараа тәкбир, тахлил хэлж) Аллахыг дурс» [1] гэж айлдсан.

Эрхэм элч (түүнд Аллахын энэрэл, амар амгалан байг):

«Аллах Таалын өмнө эдгээр арван өдрүүдэд хийсэн сайн үйлээс илүү эрхэм, хайртай үйл гэж үгүй. Тиймээс тэр үед тасбих (субханаллах), тахмид (альхамду лиллях), тахлил (лә иләһа иллаллах), тәкбир (Аллаху акбар)-ийг олноор хэл» гэжээ [2].

Шашны эрдэмтэд ташриқ тәкбир хэлэхийг нэгэн дуугаар зөвшөөрсөн (ижма хийсэн).

Шариатын дагуу ташриқ өдрүүдэд фарз залбирлын дараа нэг удаа ташриқ тәкбир хэлэх нь уажиб. Тәкбирийг имамын ард залбирч буй хүмүүс ч хэлнэ. Эмэгтэйчүүд тәкбир хэлэхдээ дуугаа өндөрсгөхгүй. Хэрвээ нэгээс олон удаа хэлбэл бас болно. Өмнөх казаа залбирлыг гүйцэтгэхэд болон ташриқ өдрүүдэд казаа болсныг дараа нь нөхөж залбирахад ташриқ тәкбир хэлэхгүй.

Ташриқ тәкбир хэлэх өдрүүд нь таван өдөр. Үүнд: арафа өдөр, гурван баярын өдөр болон дараагийн нэг өдөр багтана. Энэ жил 6-р сарын 5, 6, 7, 8, 9-нд тохиож байна. Тэгэхээр 6-р сарын 5-ны өглөөний фарз залбирлын дараа тәкбир хэлж эхлээд, 9-ний өдөр асрын залбирлын дараа дуусгана. Энэ хугацаанд нийт 23 фарз залбирлын дараа ташриқ тәкбир хэлнэ.

Ташриқ тәкбирийн үгс: Аллаһу акбар, Аллаһу акбар! Лә илааһа иллаллаһу, уаллаһу акбар! Аллаһу акбар, уә лиллаһил хамд!

Ташриқ тәкбирийн түүх нь: «Ибрахим элч хүү Исмаилийг тахил өргөхөөр хоолойг нь хэрчихэд хутга огтлоогүй. Тэгэхэд Аллах Таала Жабриил тэнгэрэлчид тахилын хонь авчрахыг тушаасан. Жабриил тэнгэрэлч Ибрахим элч хүүгээ алчих вий гэж айгаад “Аллаһу акбар, Аллаһу акбар” гэж тәкбир хэлсэн. Ибрахим элч үүнийг сонсоод “Лә илааһа иллаллаһу, уаллаһу акбар” гэжээ. Хүү Исмаил оронд нь тахил өргөснийг мэдээд “Аллаһу акбар, уә лиллаһил хамд” гэж талархсан» [3].

Хасан АМАНКУЛ
Монголын Исламын шашны төв зөвлөлийн шашны боловсрол, боловсон хүчин бэлтгэх

хэлтсийн дарга