Оё истифодаи маҳсулоти косметикӣ ҷоиз аст?

Косметика гуфта, маҳсулоте дар назар аст, ки барои беҳтар кардани намуди зоҳирӣ ва покизагӣ истифода мешаванд. Одатан, ин маҳсулот барои истифодаи маҳаллӣ, яъне ба мӯй, пӯст, нохун ва лабҳо татбиқ мегардад.

Аз замонҳои қадим инсон, бахусус занон, ба нигоҳубини зоҳир ва пӯст аҳамияти зиёд медоданд. Дар гузашта одамон рӯй, мижа, абрӯяшонро ранг мекарданд, мӯяшонро мавҷдор менамуданд ва ба ҷои атр равғанҳои хушбӯйро истифода мебурданд. Онҳо равғанҳои хушбӯйеро, ки дар таркибашон равғанҳои ҳайвонотӣ ва растанӣ, равғанҳои эфирӣ, қатронҳо ва рангҳои гуногун доштанд, ба ҷои атр истифода мекарданд.

Аз нигоҳи шариат, танҳо дар ҳолате, ки шартҳои зерин риоя шаванд, ба занон истифодаи маҳсулоти косметикӣ иҷозат дода мешавад:

• Истифодаи косметика барои зебо намудан дар назди шавҳар ё дар назди занон ва хешовандони наздик ҷоиз аст. Аммо барои ороиш ва зебо шудан дар назди мардони бегона иҷозат нест. Зеро зан бояд дар назди мардони бегона пӯшида ва бо ҳиҷоб бошад. Пас, дар чунин ҳолат чӣ гуна зан метавонад худро оро диҳад?

• Маҳсулоти косметикӣ бояд пок ва ҳалол бошанд, мисли хина (ранги сурхи растанӣ), сурма ва монанди инҳо. Истифодаи равғани ҳайвоноти мурда ё чизҳои нопок ҷоиз нест. Зеро шариат истифодаи чизҳои нопок ва ҳаром, инчунин аъзои инсонро манъ кардааст. Аз ин рӯ, истифодаи маҳсулоте, ки дар таркибаш сафедаи парандаҳо ва ҳайвоноти ҳаром, махсусан равған ё сафедаи хук ва ё ҷанин (плацента)-и инсон мавҷуд аст, ҷоиз нест.

• Маҳсулоти косметикӣ набояд ба пӯст ва бадан зарар расонанд. Истифодаи маҳсулоти кимиёвие, ки дарҳол ё баъдтар ба саломатӣ зарар мерасонанд, ҷоиз нест. Зеро шариат аз расонидани зарар ба худ манъ кардааст. Дар ин бора Паёмбар (саллаллоҳу алайҳи ва саллам) фармудаанд: «Ба худ ва ба дигарон зарар расондан ҷоиз нест» (Ибн Можа).

• Таъсири маҳсулоти косметикӣ бояд муваққатӣ бошад. Чунки амалҳое мисли варам кардани лаб, кашидани рӯй, холкӯбӣ (тату) ва тағйир додани ранги пӯст, ки боиси тағйири офариниши табиии Аллоҳ мегардад, гуноҳ ҳисобида мешавад.