Оё либосе, ки бо мошини автоматии ҷомашӯӣ шуста шудааст, пок ҳисоб меёбад?

Покӣ яке аз қоидаҳои асосии дини мост. Зеро қабул шудани бисёре аз ибодатҳо маҳз ба покӣ вобаста аст. Мусалмон бояд бидонад, ки намоз аз беҳтарин ибодатҳост ва барои дуруст хондани он, бадан, либос ва ҷои намоз бояд аз наҷосат пок бошад.

Аллоҳ Таоло дар Қуръон фармудааст: «Киёмро пок нигоҳ дор» [1].

Аз ин рӯ, мусалмон бояд бадан, либос ва ҷои ибодаташро аз чизҳое, ки шариат наҷосат гуфтааст, пок нигоҳ дорад. Ҳамчунин, донистани он ки кадом чизҳо наҷосатанд, барои ҳар мусалмон муҳим аст.

Умуман, агар чизе наҷосат расад, роҳҳои гуногуни пок кардан вуҷуд дорад. Масалан, ашёе чун шиша, корд, оина бо пок кардан тоза мешаванд. Замини тар бо хушк шудан пок мегардад. Агар ба либос наҷосати намоён, мисли хун, расад, бо бартараф кардани он пок мешавад. Агар пас аз шустани зиёд осори наҷосат дар либос, бадан ё ашё боқӣ монад, боке надорад. Аммо агар наҷосат ноаён бошад, аввал бояд шуста, баъд фишурда шавад. Агар наҷосат бо як шустан пок шавад ҳам, беҳтар аст, ки ҷои наҷосатро се бор бишӯянд. Яъне, вақте бӯй, ранг ва таъми наҷосат аз байн рафт, либос пок ҳисоб меёбад.

Агар либоси пок бо либоси наҷосатдор якҷо дар як зарф шуста шавад, ҳамааш наҷосатдор мешавад. Аммо либосе, ки бо мошини автоматии ҷомашӯӣ шуста шудааст, пок ҳисоб меёбад ва бо он метавон ибодат кард. Дар бораи ҳукми либосе, ки бо мошини автоматӣ шуста шудааст, Кумитаи Фатвои Миср чунин хулоса додааст [2]:

فتطهير الملابس بوضعها في الغسالات الأوتوماتيكية أبلغ في الطهارة من غيرها؛ لإزالتها عين النجاسة من الطعم واللون والريح أولًا بعدة غسلات، ثم إزالة حكمها بعدة غسلات، الأمر الذي ينقي الملبس من النجاسة تنقية بالغة.

«Шустани либос бо мошини автоматӣ нисбат ба дигар усулҳо беҳтар пок мекунад. Зеро аввал бо чанд маротиба шустан наҷосати аёнро бартараф мекунад, баъдан бо шустанҳои минбаъда наҷосати ноаён низ пок мешавад. Шустани либос бо мошини автоматӣ либосро аз ҳар гуна наҷосат комилан пок месозад».

Пас, агар либоси наҷосатдор бо мошини автоматӣ ва бо истифода аз хокаи махсус шуста шавад, либос дар дохили мошин чарх зада, наҷосат ба об мегузарад ва аз либос дур мешавад. Баъд оби ифлос берун карда мешавад, либос фишурда ва бо оби тоза шуста мешавад. Дар натиҷа, мошини автоматӣ либосро чанд маротиба (4-5 бор) шуста, ҳар бор обро иваз мекунад ва либосро мешӯяд.

Дар мазҳаби ҳанафӣ, наҷосатро бо оби пок ва ҳамчунин бо моеъҳое чун шарбати гул ё мева низ пок кардан мумкин аст [3]. Аз ин рӯ, агар либос бо оби омехта бо собун ё хокаи ҷомашӯӣ шуста шавад, пок ҳисоб меёбад.

Хулоса, агар либос бо мошини автоматӣ шуста шуда, ҳар бор оби истифодашуда хориҷ ва либос фишурда ва шуста шавад, он пок ҳисоб меёбад. Ин ҳукм ба мошинҳои автоматии ҷомашӯӣ дахл дорад. Аммо нисбат ба мошинҳои нимавтоматӣ ё дигар намудҳои ҷомашӯӣ ин ҳукм татбиқ намешавад. Аллоҳ донотар аст.

Шуъбаи шариат ва фатво

• [1] Сураи «Муддассир», ояти 4.

• [2] https://www.dar-alifta.org/ar/ViewResearch.aspx?%20sec=fatwa&ID=151

• [3] «Марақи ал-Фалоҳ», саҳ. 68.