Шариати мо дар бораи регрессология чӣ мегӯяд?

Регрессология як усули равоншиносӣ ва психотерапия мебошад, ки барои ёрӣ расондан ба одамон дар ёдоварӣ ва таҳлили рӯйдодҳои гузашта истифода мешавад. Ин усул бар он фарзия асос ёфтааст, ки бисёр мушкилоти имрӯзаи инсонҳо реша дар эҳсосоти коркарднашуда, осебҳо ва низоъҳои гузашта доранд.

Регрессологияро метавон барои рафъи осебҳо, фобияҳо, тарсҳо, комплексҳо, низоъҳои дохилӣ ва дигар мушкилоти равонӣ истифода бурд. Дар ҷараёни кор бо бемор, регрессолог бо истифода аз истироҳати амиқ, гипноз, импулсҳо, алоқаи баръакс ва дигар усулҳо кӯмак мекунад, то шахс бо рӯйдодҳои гузаштааш робитаро барқарор намояд ва онҳоро дар сатҳи амиқтар коркард кунад.

Аммо бояд гуфт, ки регрессология дар ҷомеаи илмӣ мавзӯи баҳснок аст ва бисёр олимон онро интиқод мекунанд, зеро далелҳои кофии таҷрибавӣ барои исботи самаранокии он ва бехатарии истифодаи усулҳои гипноз бо беморон вуҷуд надоранд. Аз ин рӯ, истифодаи регрессология талаб мекунад, ки мутахассисон дониши амиқ ва тахассуси баланд дар соҳаи психотерапия ва равоншиносӣ дошта бошанд.

Баъзе регрессологҳо ақидаи кӯчидани рӯҳ (реинкарнатсия) ва зиндагии гузаштаеро таблиғ мекунанд. Дар ин ҷо мафҳуми реинкарнатсия ба миён меояд. Реинкарнатсия ин аст, ки рӯҳи инсон баъди марг ба ҷисми дигар мегузарад ё аз як ҷисм ба ҷисми дигар кӯч мекунад. Яъне, бар асоси ин эътиқод, баъди марги инсон рӯҳаш метавонад ба инсон, ҳайвон, наботот ё ашёи беҷон кӯч кунад.

Дар асл, мафҳуми реинкарнатсия ба дини Ислом комилан мухолиф аст. Ин эътиқод ба ақидаи исломӣ мувофиқат намекунад, зеро пайравони он қиёмат, ҳисоб, ҷаннату дӯзах ва зинда шудани дубораро инкор мекунанд. Тибқи эътиқоди Ислом, инсон баъди марг ба ин дунё барнамегардад ва ҳаёт ба инсон танҳо як бор дода мешавад.

Реинкарнатсия ҳам ба ақл ва ҳам ба нақл (Қуръон ва ҳадис) мухолиф аст. Бинобар ин, имон овардан ба он инсонро ба гумроҳӣ ва куфр мебарад. Ба мусулмон лозим аст, ки аз чунин ақидаҳои мухолифи динамон дурӣ ҷӯяд.

Таҳиякунанда: Ҳасан АМАНҚУЛ,

«Мунара» рӯзнома, №8, соли 2023