ALLERGIYASI BOR ODAMLAR RO'ZANI QANDAY TUTADI?

Umuman olganda, allergolog mutaxassislar allergiyaning ko‘plab turlari borligini aytadi. Davolash usullarining ayrimlari ro‘zani buzadigan tabiiy yo‘llar — og‘iz, burun, to‘g‘ri ichak orqali amalga oshiriladi. Bu yo‘llar orqali ichkariga yetib borgan narsalar ro‘zani buzadi.

Shuning uchun allergiyasi bor odamlar quyidagilarga e’tibor berishlari kerak:

• Ro‘za tutishdan oldin, oldindan ro‘zaga tayyorlanib, davolanish choralarini ko‘rib, ayniqsa Ramazon oyida allergiyaning oldini olish yo‘llarini izlash maqsadga muvofiq. Allergologlar inson allergiyadan to‘liq tuzalmasa ham, davolanish orqali ayrim turlarini vaqtincha to‘xtatish mumkinligini aytishadi.

• Ramazon oyida allergiya sababli ro‘za tutish qiyin bo‘lsa, og‘iz ochmay, ro‘zani buzmaydigan usullar bilan davolanishga harakat qilish lozim. Allergiyaga qarshi dori-darmonlarni imkon qadar ro‘za tutishdan oldin va og‘iz ochilgandan keyin qabul qilish tavsiya etiladi. Imkon bo‘lmaganda, dorilarni ovqatga tushib ketmaydigan yo‘llarini izlash kerak. Agar ukol kabi inʼyeksiya bilan davolanish zarur bo‘lsa, bu insonga quvvat va oziq bermasligiga shifokor tavsiyasi bilan ishonch hosil qilish lozim.

• Agar ro‘zani buzmaydigan davolash usuli topilmasa, allergiya kuchaymaydigan vaqtda qazo qilish niyati bilan ro‘za tutmaslik mumkin. Sog‘aygandan so‘ng qazosini ado etadi.

Allergiyaning ro‘zaga xos jihatlaridan biri — nafas yo‘llari tiqilib, burun yoki tomoq orqali astmaga qarshi tomchi yoki sprey sepish orqali davolanish. Hanafiya fiqhida: «Tomizilgan dori ichkariga o‘tmay, burunda qolsa, ro‘zani buzmaydi» [1] deyiladi. Shuning uchun ehtiyotkorlik bilan juda oz miqdorda tomizish tavsiya etiladi. Agar bilmay ovqat yo‘liga tushib ketsa, Ramazondan keyin bir kun qazo qilinadi.

Ovqat yoki burunga tomchi tushib ketish xavfi bo‘lgani uchun burunga hidlash yoki burun va tomoq uchun sprey kabi vositalarni oz miqdorda ishlatish mumkin.

«Ramazon ro‘zasiga oid fatvolar» kitobidan

[1] «Raddu al-muxtor», 6/285.