ANIMATOR BO‘LISH SHARIATGA QARSHIMI?

Animator deb turli tadbirlarda har xil obrazlarni namoyon qiladigan aktyorga aytiladi. Mutaxassislarning fikriga ko‘ra, yaxshi animator bo‘lish uchun psixologik sezgirlik, aql-idrok, ichki madaniyat va tarbiya, aktyorlik mahorati, qo‘shiq aytish yoki raqsga tushish qobiliyati, notiqlik san’ati bo‘lishi kerak.

Animator mehmonlarni kutib olish va ularning kayfiyatini ko‘tarish bilan shug‘ullanadi. Hozirgi kunda animatorlik xizmati mehmonxona, klub, shaharlar, bayramlar va sayyohlar uchun yo‘nalishlarda uchraydi. Ular turli korporativ kechalar, tanlovlar, estafetalar va qiziqarli musobaqalarni o‘tkazishda yordam beradi.

Shariatga ko‘ra animatorlik bilan shug‘ullanish uchun quyidagi shartlarga rioya qilish lozim:

1. Yolg‘on gapirmaslik, aldashdan tiyilish. Payg‘ambarimiz (u zotga Allohning salovoti va salomi bo‘lsin): «Odamlarni kuldirish uchun yolg‘on gapiradigan kishiga halokat, halokat va yana halokat bo‘lsin!» – degan (Ahmad). Ibn Mas’ud (Alloh undan rozi bo‘lsin): «Hazil yoki chin bo‘lsa ham, yolg‘on gapirish mumkin emas. Bolalaringizga biror narsa va’da qilib, uni bajarmaslikdan saqlaninglar», – degan.

2. Asossiz birovni ayblamaslik, haqorat qilmaslik. Alloh taolo: «Orangizdan bir guruh boshqa bir guruhni masxara qilmasin», «Bir-biringizni kamsitmanglar, or-nomusga tegadigan laqablar bilan chaqirmanglar» , – deb buyurdi («Hujurot» surasi, 11-oyat).

3. Hayvonlarning harakatini yoki ovozini taqlid qilishdan tiyilish. Masalan, itdek hurish, eshakdek hangrash. Chunki Alloh taolo yomon odamni it va eshak bilan o‘xshatib, uning past darajada ekanini ko‘rsatgan. Qur’onda: «Lekin u (dunyoga) yopishib oldi va nafsiga ergashdi. Uning misoli, xuddi itga o‘xshaydi» («A’rof» surasi, 176-oyat), «Tavrotni yodlab, unga amal qilmaganlarning misoli, kitob ko‘tarib yurgan eshakning misoliga o‘xshaydi» («Juma» surasi, 5-oyat), – deb aytiladi.

4. Dinni yomon ko‘rsatmaslik. Qanday vaziyatda bo‘lmasin, musulmon kishi har doim o‘z dini, Payg‘ambari, kitobi va din olimlarini himoya qilishi lozim. Alloh taolo: «Agar ulardan nega masxara qilganlarini so‘rasang, ular: “Biz shunchaki gaplashib, hazillashayotgan edik”, – deydi. (Ularga): “Demak, sizlar Allohni, oyatlarini va Payg‘ambarini masxara qilasizlarmi?!” – deb ayt. (Ey, ikkiyuzlamachilar!) Uzr so‘ramanglar. Haqiqatda, sizlar imon keltirdik deb og‘iz bilan aytdingiz, so‘ng qalbingizdagi kufrni ochdingiz» , – degan («Tavba» surasi, 65-66 oyatlar).

Bunga salla, soqol, ro‘mol va boshqa musulmonlik atributlari hamda sunnat amallarini ham kiritish mumkin.

5. Erkak ayolga, ayol erkakka yoki dindor bo‘lmagan kishiga o‘xshamasligi kerak. Payg‘ambarimiz (u zotga Allohning salovoti va salomi bo‘lsin): «Kim o‘zini bir qavmga o‘xshatsa, u ulardan bo‘ladi» , – degan (Abu Dovud). Shuningdek, Payg‘ambarimiz (u zotga Allohning salovoti va salomi bo‘lsin) o‘zini ayollarga o‘xshatgan erkaklarni va o‘zini erkaklarga o‘xshatgan ayollarni la’natlagan (Buxoriy).

6. Uyatsiz harakat va so‘zlardan tiyilish. Payg‘ambarimiz (u zotga Allohning salovoti va salomi bo‘lsin): «Alloh uyatsizlikni (uyatsiz ish va so‘zlarni) yoqtirmaydi» , – degan (Ahmad).

Tayyorladi: Hasan AMANKUL