Автомат кир ювиш машинасида ювилган кийим пок ҳисобланадими?

Поклик – динимизда энг асосий қоидалардан бири. Чунки кўплаб ибодатларнинг қабул бўлиши айнан покликка боғлиқ. Мусулмоннинг энг улуғ ибодати намоз экани барчамизга маълум. Намознинг ташқи фарзларидан бири – баданимиз, кийимимиз ва намоз ўқийдиган жойимиз нажасдан пок бўлиши шарт.

Аллоҳ таоло Қуръонда «Кийимингни покла» [1] деб айтган.

Шунинг учун мусулмон киши шариат нажас деб кўрсатган нарсалардан баданини, кийимини ва ибодат қиладиган жойини пок сақлашга алоҳида эътибор бериши керак. Шу билан бирга, мусулмон одам шариат нажас деб ҳисоблайдиган нарсаларни билиши жуда муҳим.

Умуман, бирор нарсага нажас тегса, турли йўллар билан покланади. Масалан, ойна, пичоқ, айна каби нарсалар артилиш билан покланади. Ер қуриши билан покланади. Кийимга теккан нажас, агар қон каби кўриниб турган бўлса, уни кетказиш билан покланади. Агар кийимга, баданга ёки бошқа нарсага теккан нажасни қанча ювмасангиз ҳам, унинг ўрни қолса, бу зарар қилмайди. Агар кўзга кўринмайдиган нажас бўлса, аввал ювиш, сўнгра сиқиш керак. Нажас бир марта ювилганда ҳам кетса, нажас теккан жойни уч марта ювиш яхши. Яъни, нажаснинг ҳиди, ранги, таъми кетиши билан кийим пок ҳисобланади.

Пок кийим нажас кийим билан бирга бир идишда ювилса, ҳаммаси ҳам нажас бўлади. Энди автомат кир ювиш машинасида ювилган кийимга келсак, унда ювилган кийим пок ҳисобланади ва улар билан турли ибодатларни адо этиш мумкин. Автомат кир ювиш машиналарида ювилган кийим ҳақида Миср Фатво қўмитаси қуйидагича хулоса қилган [2]:

فتطهير الملابس بوضعها في الغسالات الأوتوماتيكية أبلغ في الطهارة من غيرها؛ لإزالتها عين النجاسة من الطعم واللون والريح أولًا بعدة غسلات، ثم إزالة حكمها بعدة غسلات، الأمر الذي ينقي الملبس من النجاسة تنقية بالغة.

«Кийимларни автомат кир ювиш машиналарида ювиш бошқа усулларга нисбатан яхшироқ тозалайди. Чунки аввал бир неча марта ювиш орқали кўринадиган нажасни кетказади. Кейинги ювишларда кўринмайдиган нажаслар ҳам йўқолади. Автомат машиналарда кийим ювиш – қайси турда бўлмасин, нажасдан тўлиқ поклайди», дейилади.

Демак, автомат кир ювиш машинасида ювилган нажас кийимлар махсус порошок қўшилиб, кийим айлантирилиб ювилади. Шу тарзда ювилганда нажас сувга тарқалади ва кийимдаги нажас йўқолади. Кейин ишлатилган сув ташқарига чиқарилади, кийим сиқилади ва яна тоза сувда чайилади. Охирида автомат машиналар кийимни бир неча марта (4-5 марта) ювиб, ҳар сафар сувни алоҳида чиқариб, чайиб беради.

Ҳанафий мазҳабида нажасни тоза сув билан, шунингдек, гул ёки меванинг шарбати каби суюқликлар билан ҳам поклаш мумкин [3]. Шунинг учун, совун ёки порошок қўшилган сувда кийим ювилса, пок ҳисобланади.

Хулоса қилиб айтганда, автомат машинада ювилган кийим бир неча марта ювилиб, ҳар сафар ишлатилган сув ташқарига чиқарилиши, кийим сиқилиб, чайилиши жиҳатидан кийим пок бўлади, дейиш мумкин. Бу ҳукм автомат кир ювиш машиналарига тегишли. Ярим автомат ёки бошқа турдаги кир ювиш машиналарига бу ҳукм татбиқ этилмайди. Аллоҳ таоло билгувчи.

Шариат ва фатво бўлими

• [1] «Муддассир» сураси, 4-оят.

• [2] https://www.dar-alifta.org/ar/ViewResearch.aspx?%20sec=fatwa&ID=151

• [3] «Мароқи ал-Фалах», 68-бет.