Ayol kishining erkak shifokorga ko‘rinishi mumkinmi?

Shariatda begona insonning avratiga qarash harom qilingan. Bu haqda Alloh taolo Qur'onda shunday deydi:

قُلْ لِلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ.

"(Muhammad s.a.v.) Mo‘minlarga ayting: (begona ayollarga qarashdan) ko‘zlarini tiyishsin va oralarini (zinodan) asrashsin" [1].

وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ.

"Mo‘mina ayollarga ham ayting: (begona erkaklardan) ko‘zlarini tiyishsin va oralarini (zinodan) asrashsin" [2].

Faqat zarurat holatida shifokorga bemorning og‘riqli joyiga qarashga ruxsat beriladi [3]. Bu "zaruratda taqiqlangan narsalarga ruxsat beriladi", "zarurat faqat zarur miqdorda bo‘ladi" [4] degan fiqhiy qoidalarga asoslanadi.

Hanafiya mazhabi olimi al-Mavsuliy shunday deydi:

"Shifokor davolash usulini ayol kishilarga o‘rgatishi kerak. Chunki erkakning ayolga qarashidan ko‘ra, ayolning ayolga qarashi yengilroq va fitnadan xoli bo‘ladi. Agar bunga imkon bo‘lmasa, imkon qadar ko‘zini tiyadi. Homilador ayolni tug‘dirayotgan akusher ayol ham imkon qadar ko‘zini tiyishga harakat qiladi" [5], – deb aytilgan.

Shuning uchun ayol kishi avvalo musulmon va malakali ayol shifokorni tanlashi kerak. Agar u bo‘lmasa, boshqa din vakili bo‘lsa ham, ishonchli va tajribali ayolga murojaat qilishi lozim. Ular ham topilmasa, faqat ishonchli musulmon erkak shifokorga murojaat qilinadi. Lekin bu holda ayolning mahrami yoki ishonchli yaqinlari yonida bo‘lishi shart.

O‘zbekiston Musulmonlari Idorasi Shariat va fatvo bo‘limi

• [1] "Nur" surasi, 30-oyat.

• [2] "Nur" surasi, 31-oyat.

• [3] Marg‘inoniy, "al-Hidoya sharhu bidayati al-mubtadi bi sharhi Abdulhay al-Laknawiy", 7/191.

• [4] Ibn Nujaym, "al-Ashbah va an-nazoir", 73.

• [5] Al-Mavsuliy, "al-Ikhtiyor li ta'lil al-mukhtar", 4/109.