Ayollarning masjidda namoz o‘qishi to‘g‘rimi?

Aslida ayollarning masjidga borib jamoat bilan namoz o‘qishida hech qanday muammo yo‘q. Lekin uyida o‘qigani afzal [1].

Allohning Elchisi (unga Allohning salovoti va salomi bo‘lsin):

لَا تَمْنَعُوا نِسَاءَكُمْ الْمَسَاجِدَ وَ بُيُوتُهُنَّ خَيْرٌ لَهُنَّ

“Ayollaringizni masjidga borishdan to‘smanlar. Lekin uylari ular uchun masjidga borishdan ham yaxshiroqdir” [2], – deganlar.

Hanafiya mazhabi ulamolari fitna (buzg‘unchilik) xavfi bo‘lgani uchun yosh ayollarning masjidga borib jamoat bilan namoz o‘qishini makruh deb hisoblashgan. Chunki Allohning Elchisi (unga Allohning salovoti va salomi bo‘lsin): “Uylari ular uchun masjidga borishdan ham yaxshiroqdir”, – deganlar. Keksaroq ayollarga esa bomdod, shom va xufton namozlarida masjidga borishga ruxsat berilgan. Bu Imom Abu Hanifaning qarashidir. Chunki yomon niyatli kishilar peshin va asr namozlarida ko‘proq bo‘ladi. Shomda esa ular kechki ovqat bilan band, bomdod va xuftonda esa uxlaydilar. Abu Yusuf va Muhammadning fikriga ko‘ra, keksaroq ayollar barcha farz namozlarda masjidga bora oladilar [3].

Agar masjidda ayollar uchun alohida joy bo‘lsa va u joyga boradigan yo‘l ham ko‘pchilik ko‘radigan joydan o‘tmasa, hech qanday muammo yo‘q. Asosiy maqsad – ayolning obro‘sini saqlash va jamiyatda turli fitnalarning oldini olishdir.

O‘zbekiston musulmonlari idorasi Shariat va fatvo bo‘limi

• [1] “al-Hidoya”, 2/354. “Bada’i as-sanayi’”, 1/275.

• [2] Abu Dovud, №5468.

• [3] Mausuli, “al-Ixtiyor”, 1/204-207. Burhonuddin, “al-Muhit”, 2/208-209. Marg‘inoniy, “al-Hidoya”, 1/57. Ibn Obidin, “Raddul muxtor”, 2/307.