BIR JINSDA QATNASH HAQIDA DIN NIMA DEYDI?

Bugungi kunda insonni maʼnaviy jihatdan buzadigan harakatlar ataylab targ‘ib qilinmoqda. Shulardan biri – bir jins vakillarining o‘zaro jinsiy aloqasi. Shariat bunday munosabatni og‘ir gunohlar qatoriga kiritadi.

Erkak bilan erkak yoki ayol bilan ayolning jinsiy aloqaga kirishi – Lut payg‘ambarning (unga Allohning salomi bo‘lsin) qavmi qilgan jirkanch ishdir. Alloh taolo Qur’onda shunday deydi:

«Lut o‘z qavmiga: “Sizlar dunyoda hech kim qilmagan bu buzuqlikni qilasizlarmi?” – dedi. “Sizlar ayollarni tashlab, erkaklarga mayl qilasizlarmi? Albatta, sizlar haddan oshgan xalq ekansizlar” (A’rof surasi, 80-81-oyatlar), «Lutga hikmat va ilm berdik. Yomon ish qiluvchi shahardan uni qutqardik. Ular, albatta, buzuq xalq edilar» (Anbiyo surasi, 74-oyat), «Biz ularga tosh yog‘diruvchi bo‘ron yubordik. Lekin Lutning oilasini tongda qutqardik» (Qamar surasi, 34-oyat) deyiladi.

Bu oyatlarda Lut payg‘ambarning (unga Allohning salomi bo‘lsin) qavmiga yuborilgan azob haqida so‘z boradi. Alloh taolo shariatga zid jinsiy aloqaning jazosi og‘ir bo‘lishini ogohlantirmoqda.

Payg‘ambarimiz (unga Allohning salovoti va salomi bo‘lsin) shunday deganlar:

«Ummatim uchun eng ko‘p xavotir qiladigan narsa – Lut qavmining ishi» , – deganlar (Tirmiziy, Ibn Moja).

Ibni Abbos (Alloh undan rozi bo‘lsin) rivoyat qilgan hadisda Payg‘ambarimiz (unga Allohning salovoti va salomi bo‘lsin) shunday deganlar:

«Hayvon bilan jinsiy aloqa qilganlar Alloh taoloning laʼnatiga uchradi! Lut qavmi qilgan ishni qilganlar Alloh taoloning laʼnatiga uchradi!» (Ahmad).

Erkak bilan jinsiy aloqa qilgan erkak va ayol bilan jinsiy aloqa qilgan ayol o‘z fitratiga zid ish qilgan hisoblanadi. Chunki Alloh taolo erkakni ayolga, ayolni erkakka mayl qiladigan qilib yaratgan. Hayvonlar ham shunday. Ularning erkagi urg‘ochisiga, urg‘ochisi erkagiga mayl qiladi. Boshqacha bo‘lishi tabiatga zid. Bir jins vakillarining o‘zaro jinsiy aloqasi turli kasalliklarga sabab bo‘ladi. Bu holat oilaning buzilishiga, qarindoshlik rishtalarining uzilishiga olib keladi. Inson Alloh taoloning buyruq va taqiqlariga amal qilgan holda salomatlik, osoyishtalik va xavfsizlikka erishadi, or-nomusi va sog‘lig‘ini saqlaydi. Shuningdek, inson faqat Alloh taoloning buyruqlariga amal qilish orqali o‘z fitratiga mos hayot kechiradi.

Alloh taolo insoniyatni avval boshdan juft qilib, ya’ni erkak va ayol qilib yaratgan. Bu haqda Qur’onda shunday deyiladi:

«...sizlarni bir kishidan yaratgan va undan uning juftini yaratib, ikkovidan ko‘plab erkak va ayollar tarqatgan Parvardigoringizdan qo‘rqinglar» (Niso surasi, 1-oyat), – deyiladi. Shuningdek, «Sizlarni juft-juft qilib yaratdik» (Naba surasi, 8-oyat) deb aytilgan.

Parvardigorimiz erkak va ayolni bir-birini jismonan va maʼnan to‘ldirish uchun juft qilib yaratgan. Ular o‘zaro muhabbat asosida oila qurishi kerak. Bu oilaning eng asosiy maqsadi – farzand ko‘rishdir. Islomda bir jins vakillarining o‘zaro jinsiy aloqasi harom ekani aynan shu tushunchaga asoslangan.

Islomda zino qanday harom bo‘lsa, bir jins vakillarining o‘zaro jinsiy aloqasi ham haromdir. Qur’onda bunday og‘ishlar «al-fahisha», ya’ni «buzuqilik, axloqsizlik» deb atalgan. Fahisha – bir jins vakillarining o‘zaro jinsiy aloqasi. Gunohga botgan Lut qavmiga tegishli jazosi berildi. Ular ko‘zlari ko‘r holatda tongda butunlay halok qilindi.

Insoniyat tarixida Alloh taoloning qonunini, insoniy axloqiy me’yorlarni (jinoyat kodeksini) mensimaganlar har doim bo‘lgan. Ular dunyoda qonunni buzib, ma’muriy yoki jinoyat jazolaridan qochib qutulgan bo‘lishi mumkin, lekin qiyomat kuni ularni yaratgan Alloh taoloning adolatli hukmidan qutula olmaydi. Hatto dindor bo‘lmagan odam ham biror jinoyat qilsa, vijdoni oldida azob chekadi. Kimdir uyat qilib gunohdan qaytsa, kimdir bu tuyg‘uni e’tiborsiz qoldiradi. Bu esa har ikki holatda ham juda xavfli.

O‘zbekiston musulmonlari idorasi Shariat va fatvo bo‘limi