Bolalarga Alloh uchun ishlatiladigan ismlar beriladimi?

Ota-onaning farzandiga nisbatan vazifalaridan biri unga chiroyli ism qo‘yishdir. Rasululloh (s.a.v.) bir hadisida, qiyomat kuni odamlar ismlari bilan chaqirilishini aytib, “(Bolalaringizga) chiroyli ism qo‘yinglar.” (Abu Dovud, Adab, 68 [4948]) deb marhamat qilganlar.

Allohga xos bo‘lgan ismlar esa aynan shu lafz bilan bolalarga berilmasligi kerak. Agar bu ismlar bolalarga beriladigan bo‘lsa, boshiga “qul” ma’nosini bildiruvchi “abd” so‘zi qo‘shilib, “Abdulloh” (Allohning quli), “Abdurahmon” (Rahmonning quli), “Abdurazzoq” (Razzoqning quli), “Abdulholiq” (Holiqning quli) tarzida berilishi lozim.

Alloh taoloning “asmaul husna”sidan “Karim, Latif, Ra’uf, Mo‘min…” kabi ismlar esa Allohdan boshqa bandalarga ham xos bo‘lishi mumkin bo‘lgan umumiy ismlar bo‘lgani uchun, Allohga xos bo‘lmagan bu ismlar bolalarga ism sifatida berilishi mumkin. (Ibn Abidin, Raddul-Muhtar, 6/417)

Manba: T.C. Diyanet İşleri Başkanlığı, Din İşleri Yüksek Kurulu