Botoks qilish shariatda joizmi?

Alloh Taolo Qur'onda Iblis shaytonning quyidagicha qasam ichganini eslatadi:

«Ularni Alloh yaratgan narsani o‘zgartirsinlar deb buyuraman» («Niso» surasi, 119-oyat)

Payg‘ambarimiz (unga Allohning salovoti va salomi bo‘lsin) shunday deganlar:

«Alloh Taolo tanaga surat chizganlarni, surat chizdirganlarni, qoshini yulganlarni, qoshini yuldirganlarni, go‘zallik uchun tishlarini orasini ochganlarni, Alloh yaratgan narsani o‘zgartirganlarni la'natlagan» (Muslim).

Demak, ortiqcha go‘zallik uchun yoki tabiiy qarilikni yashirish, tabiiy ko‘rinishdan tashqariga chiqib, yaratilishni o‘zgartirish, shuningdek, firibgarlik va ko‘zbo‘yamachilik niyatida qilinsa, shariatimiz botoks qilishni qat'iyan man etadi. Ammo inson a'zolaridagi biror nuqsonni bartaraf etish, tug‘ma yoki keyinchalik paydo bo‘lgan kamchiliklarni tiklash kabi zaruriy davolanish uchun ruxsat beriladi.

Agar botoksning zarari ko‘proq yoki zarari va foydasi teng bo‘lsa, uni ishlatish ham man qilinadi. Chunki shariatimizda o‘ziga ham, boshqalarga ham zarar yetkazishga ruxsat yo‘q. Shuningdek, ikki zarar to‘qnash kelsa, eng yengili qoldirilib, kattasi yo‘q qilinadi, deyiladi.

Botoks qilishning ikki usuli bor: davolash va kosmetik. Kosmetologiyada u yuz ajinlarini tekislash uchun ishlatiladi. Davolash maqsadida esa u serebral falaj, qiyshiq bo‘yin, insultdan keyin, mushak va qov sohasidagi har qanday kasalliklar natijasida yuzaga kelgan yuz assimetriyasini bartaraf etish, ortiqcha ter ajralishini to‘xtatish uchun qo‘llaniladi.
Botoks mushakka yuborilib, uni harakatsizlantiradi. Uning maqsadi — ajinlarni tekislash. Botoks mushakka kirib, terini qotirib turadi, natijada ajin shu zahoti tekislanadi va undan qutulish imkonini beradi.

Mutaxassislarning aytishicha, botoks organizmga zararli, asab tizimini, mimikani buzadi va qaramlikka olib keladi. Insonlarning organizmi har xil bo‘lgani uchun, kimdir botoksni yaxshi qabul qilsa, boshqasida allergiya bo‘lishi mumkin. Yoshi ulg‘aygan sari yuz mushaklari zaiflashadi. Shunga ko‘ra, botulinoterapiya miqdori ham kamayadi. Biroq bu insonning hayot tarzi va organizmning moddalar almashinuvi bilan bog‘liq.

Tayyorlagan Hasan AMANKUL,

«Munara» gazetasi, №2, 2022 yil