BREKET QO'YDIRISH MUMKINMI?

Aslida har bir inson o'ziga xos go'zal va betakror yaratilgan. Alloh taolo Qur'onda shunday deydi:

«Shubhasiz, Biz insonni eng go'zal, eng mukammal qiyofada yaratdik», – deb aytilgan («Tin» surasi, 4-oyat).

Shuning uchun har bir inson boshqa a'zolari kabi tishlarining ham chiroyli va to'g'ri bo'lishini istaydi. Hozirgi kunda tishni to'g'rilash uchun zamonaviy ortodontik texnologiyalar qo'llaniladi. Ular olinadigan va olinmaydigan tish protezlari, tish plastinkalari va breketlardir. Bundan tashqari, breket tish kasalliklari xavfini kamaytiradi, milk kasalliklari ehtimolini pasaytiradi, so'zlarning aniq chiqishini ta'minlaydi, yuz chiroyini oshiradi va nafas olishni yaxshilaydi.

Hadislarda Payg'ambarimiz (u zotga Allohning salovoti va salomi bo'lsin) o'z tishlariga alohida e'tibor berganlari aytilgan. Bir kuni u zot:

«Agar ummatimga qiyinchilik bo'lmaganida, men ularga har namoz oldidan tishlarini tozalashni buyurgan bo'lardim»

, – deganlar (Buxoriy va Muslim). Alloh elchisi (u zotga Allohning salovoti va salomi bo'lsin) uyidan chiqqanda ham, uyiga qaytganda ham va har namozdan oldin tishlarini tozalagan, shuningdek, tahajjud namozidan oldin ham tish tozalashni buyurgan, chunki farishtalar hushbo'y hidga yaqinlashar ekan.

Breket sog'liq uchun ham juda muhim. Chunki u chiroyli tabassum va keksayganda tishlarning to'liq saqlanishiga yordam beradi.

Mutaxassislarning aytishicha, tishlarning o'lchami, tishlamasi, joylashuvi va og'iz bo'shlig'i parametrlari milk, hatto oshqozon va ichak salomatligiga ham ta'sir qiladi. Shunga qaramay, sog'lom tish Allohning katta ne'mati ekani aniq.

Davolanish, nuqsonni yashirish yoki chiroyli ko'rinish maqsadida tishga breket qo'yib, qiyshiq tishni to'g'irlashga shariat ruxsat beradi. Chunki Alloh elchisi (u zotga Allohning salovoti va salomi bo'lsin):

«Ey Allohning bandalari, davolaninglar! Zero, Alloh dardni ham, davo ham yaratgan»

, – deganlar (Termiziy, Ibn Moja).

Breket qo'yib, qiyshiq tishni to'g'rilash yoki tiklash Alloh yaratgan qiyofani o'zgartirish hisoblanmaydi. Breket qo'ydirgan odam gunohkor bo'lmaydi. Bundan tashqari, breket qo'yish tahorat va g'uslga ham halal bermaydi.