GO‘DAK TANASIGA JIN KIRISHI MUMKINMI?

Jin – inson va farishta kabi Allohning maxluqi. Ular ham yaxshi va yomon bo‘lishi mumkin. Yaxshi (musulmon) jinlar Payg‘ambarimizga (u zotga Allohning salovoti va salomi bo‘lsin) "Biz odamlarga hech qanday zarar yetkazmaymiz, lekin odam bilmay bizga tegsa, o‘ch olishimiz mumkin" deb va’da bergan. Yomon (kofir) jinlar esa, aksincha, insonlarga turli yo‘llar bilan zarar yetkazishga harakat qiladi.

Shayton – "yiroqlashtirilgan", "chegaradan o‘tgan" degan ma’noni bildiradi va jinlarga nisbatan ishlatiladi. Jin-shaytonlar ko‘pincha sahro va iflos joylarda bo‘ladi. Quyosh botganda ular yer yuziga tarqala boshlaydi. Shuning uchun Payg‘ambarimiz (u zotga Allohning salovoti va salomi bo‘lsin) shunday vasiyat qilganlar:

"Quyosh botganda bolalaringizni yoningizga yaqin tutinglar! Chunki bu paytda shaytonlar yer yuziga tarqaladi. Kech kirgach esa (bolalarni) qo‘yib yuborishingiz mumkin" (Buxoriy, Muslim).

Ko‘pchilik ulamolarning fikriga ko‘ra, jin har qanday insonga yaqinlashishi, unga yopishib olishi, hatto tanasiga kirib, unda yashab olishi mumkin. Qur’oni Karimda:

"Foiz yeganlar (qiyomatda) go‘yo shayton urib, jinnilikka uchragan odam kabi turadilar" – deyiladi ("Baqara" surasi, 275-oyat).

"Jinnilikka uchragan" deganda, jin urgan emas, balki jinning ta’siriga tushgan, ya’ni jin kirgan odam nazarda tutiladi. Jin inson tanasiga turli yo‘llar bilan kirishi mumkin. Buning maxsus belgisi yo‘q. Sabablari ham har xil bo‘lishi mumkin. Masalan, eshik oldiga iflos suv to‘kish, tashqarida tunab qolish, axlat ustiga bosish, hayvon suyagini tepish, gunoh qilish yoki sehr ta’sirida qolish kabi holatlar jin tegishiga sabab bo‘lishi mumkin.

O‘rinsiz kulish yoki yig‘lash, Qur’on o‘qilganda ichki norozilik sezish, aqliy zaiflik, mushaklar tortishishi, uyqusizlik, iflos joylarda yurish kabi holatlar jin kirgan odamning asosiy belgilaridan hisoblanadi.

Lekin jin inson tanasiga kira oladi, deb undan haddan tashqari qo‘rqish kerak emas. Aksincha, musulmon odam jin va shaytonning zararidan saqlanish yo‘llarini izlash lozim.

Allohni eslab, zikr qilish – jin va shaytonga qarshi eng kuchli va ishonchli quroldir. Ayniqsa, "Fotiha", "Kofirun", "Ixlos", "Falaq", "Nas" suralari va Kursiy oyatini o‘qish juda foydali. Shuningdek, Haq Taologa tavakkal qilib, barcha ishda Unga suyanish, ovqatlanishda bismillah aytish, doim tahoratda yurish, g‘usl qilish, o‘ziga ruqya qilish kabi amallar baloning yaqinlashishiga to‘sqinlik qiladi yoki undan xalos bo‘lishga yordam beradi. Bundan tashqari, jinlardan himoyalanish uchun Payg‘ambarimiz (u zotga Allohning salovoti va salomi bo‘lsin) o‘rgatgan tonggi va kechki sunnat duolarni o‘qib yurish kerak.

Qur’oni Karimda:

"Mening bandalarim ustidan senga hech qanday kuch yo‘q. Sen faqat o‘zingga ergashgan adashganlarga ta’sir eta olasan" – deyiladi ("Hijr" surasi, 42-oyat).

Demak, shayton Allohni zikr qilib, ibodatda bo‘lgan bandaga yaqinlasha olmaydi.

Payg‘ambarimiz (u zotga Allohning salovoti va salomi bo‘lsin) nabiralari Hasan va Husaynni shayton va zaharli hasharotlar, yomon ko‘zdan asrashini Allohdan so‘rab duo qilganlar (Buxoriy).

Hasan AMANQUL,

Shariat va fatvo bo‘limi boshlig‘i o‘rinbosari,

"Munara" gazetasi, №15, 2020 yil