Hojat namozi qanday o‘qiladi?

Musulmon kishi, o‘ziga kerakli narsani qo‘lga kiritish uchun Alloh taolo o‘rgatgan sabab va qonunlarni imkon qadar bajarishga harakat qilishi va natijasini Allohdan kutishi lozim. Shuningdek, oxirat yoki dunyoga oid bir istagini amalga oshishini xohlab, Alloh roziligi uchun namoz o‘qishi ham joizdir. O‘qilgan ushbu namoz “Hojat namozi” deb ataladi. Bu borada Rasululloh (s.a.v.) shunday deganlar: “Kishi, o‘ziga kerakli narsani Allohdan yoki bir odamdan so‘ramoqchi bo‘lsa, avval chiroyli tahorat olsin, so‘ng ikki rakat namoz o‘qisin. So‘ng Allohni zikr qilib, Rasulullohga salovot aytsin va shunday desin:

لاَ إِلَهَ إِلاَّ اللَّهُ الحَلِيمُ الكَرِيمُ، سُبْحَانَ اللهِ رَبِّ العَرْشِ العَظِيمِ، الحَمْدُ لِلَّهِ رَبِّ العَالَمِينَ، أَسْأَلُكَ مُوجِبَاتِ رَحْمَتِكَ وَعَزَائِمَ مَغْفِرَتِكَ وَالغَنِيمَةَ مِنْ كُلِّ بِرٍّ وَالسَّلاَمَةَ مِنْ كُلِّ إِثْمٍ لاَ تَدَعْ لِي ذَنْبًا إِلاَّ غَفَرْتَهُ وَلاَ هَمًّا إِلاَّ فَرَّجْتَهُ وَلاَ حَاجَةً هِيَ لَكَ رِضًا إِلاَّ قَضَيْتَهَا يَا أَرْحَمَ الرَّاحِمِينَ.

Hilim va karam sohibi Allohdan boshqa iloh yo‘q. Buyuk arsh egasi bo‘lgan Allohni har qanday nuqsonlardan poklayman. Har qanday hamd olamlar Robbisi Allohgadir. Rahmatingga sabab bo‘ladigan amallarni, mag‘firatingga olib boradigan sabablarni, har turli yaxshilikni qo‘lga kiritishni va har qanday gunohdan najot topishni sendan so‘rayman. Kechirmagan biror gunohimni, yengillatmagan biror tashvishimni qoldirma! Roziligingga mos bo‘lgan har qanday hojatimni ijobat qil!” (Tirmiziy, Vitir, 348 [479]; Ibn Moja, Iqomatus-salavat, 189 [1384])

Hojat namozi to‘rt yoki ikki rakat qilib o‘qilishi mumkin. Uni o‘n ikki rakat qilib o‘qish haqida ham rivoyat bor. Ushbu namozni to‘rt rakat qilib o‘qimoqchi bo‘lgan kishi, birinchi rakatda Fotiha surasidan so‘ng uch marta Oyatul Kursi, qolgan uch rakatda esa har birida Fotiha bilan birga Ihlos, Falak va Nos suralarini o‘qiydi. So‘ng yuqorida zikr etilgan duoni qiladi. (Ibn Obidin, Raddul-muxtor, 2/28)

Manba: T.C. Diyanet İşleri Başkanlığı, Din İşleri Yüksek Kurulu