Ihtilom bo‘lish g‘uslni vojib qiladimi?

Agar bir kishi ihtilom bo‘lsa, lekin uxlab uyg‘onganda o‘zida yoki kiyimida ho‘llik ko‘rmasa, unga g‘usl qilish vojib emas. (Ibn Abidin, Raddul-muhtar, 1/164) Bunga qarama-qarshi ravishda, tush ko‘rganini eslamasa ham, uyg‘onganda o‘zida yoki kiyimida ho‘llik topsa, unga g‘usl qilish vojib bo‘ladi. (Abu Dovud, Tahorat, 92-93 [236-237]; Termiziy, Tahorat, 82 [113])

Hazrat Oisha (r.anha) shunday rivoyat qiladi: “Rasulullohga, ‘Bir kishi uxlab uyg‘ongandan so‘ng kiyimida ho‘llik topsa, lekin ihtilom bo‘lganini eslamasa (unga g‘usl vojibmi?)’ deb so‘raldi. U zot, ‘Ha, g‘usl qilishi kerak!’ deb javob berdilar. So‘ng, ihtilom bo‘lganini eslab, lekin ho‘llik sezmagan kishining holati so‘raldi: ‘Unga g‘usl vojib emas’, dedilar. Ummu Sulaym (r.anha) so‘radi: ‘Agar buni ayol ko‘rsa, unga ham g‘usl vojibmi?’ Shunda ham: ‘Ha! Ayollar ham erkaklar kabidir’, deb javob berdilar.” (Abu Dovud, Tahorat, 92 [236]; Termiziy, Tahorat, 82 [113]) Yana Oisha (r.anha) rivoyat qiladi: “Ummu Sulaym (r.anha) Rasulullohga (s.a.s.), ‘Tushida erkak ko‘radigan narsani ko‘rgan ayolga ham g‘usl vojibmi?’ deb so‘radi. Rasululloh, ‘Ha, agar ho‘llik sezsa’, deb javob berdilar.” (Abu Dovud, Tahorat, 93 [237]; Nasoiy, Tahorat, 131 [196]; qarang: Muslim, Hayz, 32-33 [313-314]) Demak, ayollar ham erkaklar kabi ihtilom bo‘lgach, kiyimlarida ho‘llik ko‘rsalar, g‘usl qilishlari vojib bo‘ladi.

Manba: T.C. Diyanet İşleri Başkanlığı, Din İşleri Yüksek Kurulu