Istihora namozi qanday o‘qiladi? Istihora qanday qilinadi?

Istihora — bu, biror ishning o‘zi uchun yaxshimi yoki yo‘qligini bilish maqsadida odam yotishdan oldin ikki rakat namoz o‘qib, Allohdan duo qilib so‘rashidir. Ba’zan odamlar o‘zlari uchun muhim bir qaror qabul qilmoqchi yoki tanlov qilmoqchi bo‘lishganda, dunyo va oxirat nuqtai nazaridan qaysi biri yaxshiroq ekanini aniqlay olmaydilar. Buni tushunish uchun ular maslahatlashadilar va Allohdan yordam so‘raydilar. Shu ma’noda istihora — qilinadigan ishning yaxshilik bo‘lishini, agar yaxshilik bo‘lsa amalga oshishini Allohdan so‘rash va Undan yordam tilashdir. Payg‘ambarimiz (s.a.v.) sahobalariga har bir ishda istihorani, Qur’onning bir surasini o‘rgatganidek o‘rgatganlar. (Buxoriy, Tahajjud, 28 [Bob Sarlavhasi]; Da’vat, 48 [6382]; Tavhid, 10 [7390])

Istihora namozi mandub bo‘lib, birinchi rakatda Fotiha surasidan so‘ng Kofirun surasi, ikkinchi rakatda Fotiha surasidan so‘ng Ixlos surasi o‘qiladi. Namozdan so‘ng istihora duosi qilinadi. Payg‘ambarimiz (s.a.v.) istihorada quyidagicha duo qilishni tavsiya qilganlar:

اللَّهُمَّ إِنِّي أَسْتَخِيرُكَ بِعِلْمِكَ وَأَسْتَقْدِرُكَ بِقُدْرَتِكَ وَأَسْأَلُكَ مِنْ فَضْلِكَ العَظِيمِ، فَإِنَّكَ تَقْدِرُ وَلاَ أَقْدِرُ وَتَعْلَمُ وَلاَ أَعْلَمُ وَأَنْتَ عَلَّامُ الغُيُوبِ، اللَّهُمَّ إِنْ كُنْتَ تَعْلَمُ أَنَّ هَذَا الأَمْرَ خَيْرٌ لِي فِي دِينِي وَمَعَاشِي وَعَاقِبَةِ أَمْرِي - أَوْ قَالَ عَاجِلِ أَمْرِي وَآجِلِهِ - فَاقْدُرْهُ لِي وَيَسِّرْهُ لِي، ثُمَّ بَارِكْ لِي فِيهِ وَإِنْ كُنْتَ تَعْلَمُ أَنَّ هَذَا الأَمْرَ شَرٌّ لِي فِي دِينِي وَمَعَاشِي وَعَاقِبَةِ أَمْرِي - أَوْ قَالَ فِي عَاجِلِ أَمْرِي وَآجِلِهِ - فَاصْرِفْهُ عَنِّي وَاصْرِفْنِي عَنْهُ وَاقْدُرْ لِي الخَيْرَ حَيْثُ كَانَ ثُمَّ أَرْضِنِي.

“Allohim! Sendan, ilm-ing bilan men uchun yaxshilik bo‘lganini bildirishingni, qudrating bilan menga kuch berishingni so‘rayman. Sendan buyuk fazlingdan in’om etishingni so‘rayman. Sen hamma narsaga qodirsan, men esa ojizman; sen hamma narsani bilasan, men esa bilmayman; chunki sen barcha yashirin narsalarni eng yaxshi biluvchisan. Allohim! Qilmoqchi bo‘lgan bu ish, mening dinim, hayotim, dunyo va oxiratim nuqtai nazaridan men uchun yaxshilik bo‘lsa, uni menga taqdir qil, uni menga oson qil, baraka va fayz ato et! Agar bu ish, mening dinim, hayotim, dunyo va oxiratim nuqtai nazaridan yomon bo‘lsa, uni mendan, meni undan uzoqlashtir. Qayerda bo‘lsa ham yaxshilikni menga taqdir qil va undan meni rozi qil!” (Buxoriy, Tahajjud, 28 [Bob Sarlavhasi]; Da’vat, 48 [6382]; Tavhid, 10 [7390])

Ibodatu savob ishlar kabi yaxshi ekani, harom va gunoh ishlar kabi yomon ekani aniq bo‘lgan narsalarda istihora qilinmaydi. Istihora, qilinishi to‘g‘ri yoki noto‘g‘ri ekani haqida shubha bo‘lgan ishlar uchun qilinadi va yetti marta takrorlanishi mumkin. Istihoradan so‘ng, insonning ko‘ngliga bir ochiqlik keladi va birinchi marta yurakka kelgan narsa yaxshilik deb qabul qilinib, unga muvofiq harakat qilinadi. (Ibn Obidin, Raddul-muxtor, 2/26-27) Istihoradan so‘ng tush ko‘rish va bu tushingni yaxshi yoki yomon deb talqin qilishga asos yo‘q. Istihora namozi o‘qila olmasa, faqat duosi o‘qilishi kifoya qiladi.

Manba: T.C. Diyanet İşleri Başkanlığı, Din İşleri Yüksek Kurulu