Juma namozining to‘g‘ri bo‘lishi uchun shaharda o‘qilishi shartmi?

Islom olimlari juma namozi o‘qiladigan joy shahar yoki shahar maqomidagi aholi punkti bo‘lishini shart qilganlar. Bu hukm Payg‘ambarimiz (s.a.s.)ning shahar yoki shahar maqomidagi joydan tashqarida juma namozi o‘qilmasligi haqidagi hadisi asosida belgilangan. (Bayhaqiy, es-Sünenü’l-kübrâ, 3/254 [5615]) Manbalarda keltirilgan bu shahar sharti hozirgi kunda katta yoki kichik aholi punkti sifatida tushunilishi lozim. Chunki Payg‘ambarimiz (s.a.s.) birinchi juma namozini Makkadan Madinaga hijrat qilganlarida, Salim ibn Avf avlodlari istiqomat qilgan Ranoniy deb atalgan vodiyda o‘qitganlar. (Ibn Hishom, es-Sîre, 1/494) Bundan tashqari, Payg‘ambarimiz “Bir aholi punktida, faqat to‘rt kishi bo‘lsa ham, juma namozi o‘qish farzdir.” (Bayhaqiy, es-Sünenü’l-kübrâ, 3/255) deb aytganlar.

Shunga ko‘ra, farzini ado etadigan miqdorda jamoat to‘plangan qishloq, qishloq shaharchasi, shahar kabi katta yoki kichik barcha aholi punktlarida o‘qilgan juma namozi to‘g‘ridir. Faqat shuni ta’kidlash kerakki, qayerda o‘qilmasin, diniy vakolatli idoralardan ruxsat olinishi lozim.

Manba: T.C. Diyanet İşleri Başkanlığı, Din İşleri Yüksek Kurulu