Kosmetik mahsulotlardan foydalanish mumkinmi?

Kosmetika deb tozalikka va tashqi ko‘rinishni yaxshilash uchun ishlatiladigan mahsulotlarga aytiladi. U odatda mahalliy qo‘llaniladi, ya’ni soch, teri, tirnoq va labga surtiladi.

Qadimdan insonlar, ayniqsa ayollar tashqi ko‘rinishini yaxshilash, terini parvarish qilishga alohida e’tibor bergan. Ilgari odamlar yuzini, kiprik va qoshlari bo‘yab, sochini jingalak qilib, atir o‘rniga xushbo‘y moylardan foydalangan. Ular tarkibida hozirgidek hayvon va o‘simlik yog‘lari, efir moylari, turli qatron va bo‘yoqlar bo‘lgan xushbo‘y moylarni atir o‘rnida ishlatganlar.

Shariatga ko‘ra quyidagi shartlar bajarilganda ayollarga kosmetik vositalardan foydalanishga ruxsat beriladi:

• Kosmetikani eriga chiroyli ko‘rinish uchun yoki ayollar va yaqin qarindoshlari oldida o‘zini go‘zal ko‘rsatish uchun ishlatish joiz. Lekin begona erkaklar oldida pardoz-andoz qilib yurish mumkin emas. Chunki ayol kishi begona erkaklar oldida iloji boricha yopiq va hijobda bo‘lishi lozim. Demak, bunday holatda ayol qanday qilib pardoz qilishi mumkin?!

• Kosmetik vositalar xina, surma kabi pok bo‘lishi shart. O‘lik hayvon yog‘i yoki najas narsalarni ishlatish joiz emas. Chunki shariatimiz najas va harom narsalarni, shuningdek, inson a’zosini ishlatishni man etgan. Shuning uchun go‘shti yeyilmaydigan qush va hayvon oqsili, ayniqsa cho‘chqa yog‘i va oqsili hamda ayolning yo‘ldoshi (homiladorlikda bachadon ichida rivojlanadigan, ona va homila o‘rtasidagi aloqani ta’minlaydigan muhim a’zo) qo‘shilgan kosmetik mahsulotlardan foydalanmaslik kerak.

• Kosmetik vositalar tanaga va teriga zararli bo‘lmasligi lozim. Shu zahoti yoki keyinchalik zarar yetkazadigan kimyoviy mahsulotlardan foydalanish joiz emas. Chunki shariatimiz o‘ziga zarar yetkazishni man etgan. Bunga Payg‘ambarimizning (унга Аллоҳнинг салавоти ва саломи бўлсин) «O‘ziga va boshqalarga zarar yetkazish mumkin emas» degan so‘zi dalil (Ibn Moja).

• Kosmetik vositalarning tanaga ta’siri vaqtincha bo‘lishi shart. Chunki labni shishirish, yuzni haddan tashqari tortish, tanada doimiy iz qoldiradigan tatuirovka qilish, teri rangini o‘zgartirish kabi Alloh Taolo yaratgan asl ko‘rinishni o‘zgartirish gunoh hisoblanadi.