Muska ishlatish joizmi?

Muska — kasallik, ko‘z tegishi, ofatdan saqlanish yoki qutulish kabi maqsadlarda insonlar yonlarida olib yuradigan, ichida ba’zi oyat, hadis va duolar yozilgan matndir. Odatda himoya qiluvchi bir materialga o‘ralgan holda ishlatiladi.

Qo‘rquv va ko‘z tegishidan saqlanish, ba’zi kasalliklardan shifo topish uchun duo qilish, Qur’on oyatlarini o‘qish joizdir. (Buhârî, Fezâilü’l-Qur’ân, 9 [5007]; Muslim, Salâm, 65-66 [2201]; Ibn Mâja, Tibb, 35-36 [3517-3525]) Oyat va duo kabi matnlarning biror narsaga yozilib, inson tanasiga taqilishi yoki ilib qo‘yilishi haqida Payg‘ambarimizdan rivoyat yo‘q. Lekin Abdulloh ibn Amr, Payg‘ambarimiz (s.a.v.) “Sizlardan biringiz uxlayotganda qo‘rqsa, ‘Allohning g‘azabi va azobidan, bandalarining yomonligidan, shaytonlarning vasvasasidan va menga yaqinlashishidan, nuqsoni bo‘lmagan Allohning so‘zlariga sig‘inaman’, desin. Shunda unga hech narsa zarar qilmaydi.” deganlarini xabar qilgan va o‘zi ham bu duoni aql yoshiga yetgan farzandlariga o‘rgatib, aql yoshiga yetmagan bolalari uchun yozib, bo‘yniga osib qo‘ygan. (Abu Dâvûd, Tibb, 19 [3893]; Termiziy, Duolar, 94 [3528])

Ba’zi olimlar Qur’ondan oyatlarni yozib, muska qilib taqishda hech qanday zarar yo‘q deb hisoblashadi. (Shofi’iy, al-Umm, 7/241; Zayla’iy, Tabyin, 1/58) Biroq muskadan yordam kutish, uni himoya qiluvchi deb bilish, Allohdan (j.j.) kutilishi lozim bo‘lgan narsalarni muskadan kutish kabi salbiy holatlarga sabab bo‘lsa, muska ishlatish joiz emas. Shu nuqtai nazardan, odamlarning his-tuyg‘ularidan foydalanadiganlarga nisbatan ham ogoh bo‘lish lozim.

Manba: T.C. Diyanet İşleri Başkanlığı, Din İşleri Yüksek Kurulu