Namoz o‘qimagan odam gunohkormi?

Namoz – Islom dinining besh asosiy ustunidan ikkinchisi hisoblanadi. Ibn Umar (roziyallohu anhu)dan rivoyat qilingan hadislarda Payg‘ambarimiz (u zotga Allohning salovoti va salomi bo‘lsin) shunday deganlar: "Islom besh narsa ustiga qurilgan: Allohdan boshqa iloh yo‘qligiga va Muhammad Uning elchisi ekaniga guvohlik berish, namozni ado etish, zakot berish, imkoniyati yetgan kishiga haj qilish va Ramazon oyida ro‘za tutish".

Ya’ni, iymon keltirganimizdan so‘ng, Payg‘ambarimizga (u zotga Allohning salovoti va salomi bo‘lsin) farz qilingan birinchi ibodat – bu namozdir. Shuningdek, namoz oxiratda eng avval so‘raladigan amal hisoblanadi. Hadisda: "Qiyomat kuni bandaning amallaridan eng avval hisob-kitob qilinadigan narsa – namozdir. Agar namozi to‘g‘ri bo‘lsa, u quvonchga to‘ladi va yaxshilikka erishadi. Agar namozi to‘g‘ri bo‘lmasa, u qayg‘uga botadi va afsuslanadi..." deyilgan. Yana bir hadisda: "Namoz – dinning ustuni. Kim uni ado etsa, dinni tiklagan bo‘ladi. Kim uni tark etsa, dinni qulatgan bo‘ladi" deyilgan.

Kuniga besh mahal namoz o‘qish har bir balog‘at yoshiga yetgan, aqli raso musulmon uchun farz ayn hisoblanadi. Ya’ni, har bir musulmon bu ibodatni o‘zi ado etmaguncha, farzi zimmasidan tushmaydi. Kimki bu dunyoda farz bo‘lgan namozini ado etsa, zimmasidagi vazifadan qutuladi va oxiratda o‘qigan namozlari uchun savob oladi hamda o‘qigan namozlari uning jannatga kirishiga sabab bo‘ladi. Hadisda: "Jannatning kaliti – namoz. Namozning kaliti – tahorat" deyilgan. Kimki dangasalik qilib, namozga beparvo bo‘lsa va bu dunyoda namoz o‘qimasa, u kishi gunohkor bo‘ladi.

Xulosa qilib aytganda, balog‘at yoshiga yetgan, aqli raso musulmon erkak va ayol uchun kuniga besh mahal namoz o‘qish – farzdir. Qiyomat kuni eng avval so‘raladigan amal – namozdir. Namoz o‘qish orqali musulmon Alloh taoloning roziligiga erishadi, namoz o‘qimaslik esa Allohning buyrug‘iga qarshi chiqish va gunoh qilish hisoblanadi. Alloh taolo hammamizni namozga sobit, mukammal va doimiy o‘quvchi bandalaridan qilsin!

Medet QURMASHULI

"Imon" jurnali, №10, 2024 yil