NAMOZ O‘QIMASA HAM, RO‘ZA QABUL BO‘LADIMI?

Ibni Umar (Alloh undan rozi bo‘lsin) rivoyat qilgan hadislarda Allohning elchisi (unga Allohning salovoti va salomi bo‘lsin) shunday degan: "Islom besh narsa ustiga qurilgan. Ular – «Лә иләһа илләллаһу уә әннә Мухаммадән расулуллаһи» kalimasi, namozni to‘liq o‘qish, zakot berish, hajga borish va Ramazon oyida ro‘za tutish" (Buxoriy, Muslim).

Islomda farz qilingan barcha ibodatlarni ado etish – burchdir. Biroq musulmonning barcha ibodatlari qabul bo‘lishi va savob berilishi uning chin e’tiqodiga (imoniga) bog‘liq. Ya’ni Muhammad (unga Allohning salovoti va salomi bo‘lsin) payg‘ambar Alloh taolo tomonidan yetkazgan narsalarga chin yurakdan ishonsa, namoz o‘qisa, ro‘za tutsa, zakot bersa, hajga borsa va boshqa ezgu amallarni qilsa, duolari qabul bo‘ladi, unga savob beriladi. Demak, barcha ezgu ishlarning qabul bo‘lishi – eng avvalo bizning imonimizga bog‘liq.

Alloh taolo hech bir amalni mukofotsiz yoki jazolarsiz qoldirmaydi. Bu haqda Qur’onda shunday deyiladi:

"Bas, kim zarracha yaxshilik qilsa, uning mukofotini oladi. Kim zarracha yomonlik qilsa, uning jazosi unga yetadi" ("Zalzala" surasi, 7-8 oyatlar).

Alloh taolo namoz o‘qimagani uchun bandasining tutgan ro‘zasini e’tiborsiz qoldirmaydi, unga munosib mukofot va savob beradi. Parvardigorimiz o‘z adolati haqida muqaddas Qur’onda shunday deydi:

"Qiyomat kuni o‘sha kunga xos adolat tarozilarini o‘rnatamiz va odamlarning dunyodagi amallarini to‘liq o‘lchaymiz. O‘sha kuni hech bir jon biror nohaqlikka uchramaydi. Qilingan amal xantal urug‘ichalik bo‘lsa ham, uni taroziga qo‘yamiz. Biz hisob-kitob qiluvchilar sifatida yetarlimiz" ("Anbiyo" surasi, 47-oyat).

Kuniga besh mahal namoz o‘qish va Ramazon oyida ro‘za tutish – Islomda alohida-alohida farz ibodatlardir. Namoz o‘qimaydigan odam ham ro‘za tutishi mumkin. Lekin namozning fazilati ulug‘, uni tark etish katta gunoh ekanini unutmaslik kerak. Namoz – har bir balog‘atga yetgan, aqli raso kishiga farz. Namoz – kuniga besh mahal ado etiladigan ibodat. Qiyomatda ham eng avval so‘raladigan amal – namozdir.

Payg‘ambarimiz (unga Allohning salovoti va salomi bo‘lsin): "Qiyomat kuni eng avval bandadan namoz haqida so‘raladi. Agar namozi to‘g‘ri bo‘lsa, najot topadi va yutadi. Agar namozi bo‘lmasa, aldangan va ziyon ko‘rgan bo‘ladi", degan (Termiziy, Abu Dovud, Nasoiy).

Tayyorladi: Hasan AMANKUL