Oxirzamon davrida Madiyning chiqishi haqmi?

Qur'onda Imom Mahdiy va uning kelishi haqida hech narsa aytilmagan. Lekin Abu Dovud, Termiziy, Ibn Moja, Tabaroniy, Abu Ya'lo, Bazzaz, Ahmad ibn Hanbal kabi hadis olimlari sahobalardan Imom Mahdiy haqida bir qancha hadislarni rivoyat qilgan. Ba'zilarida Imom Mahdiyning ismi ochiq aytilgan bo‘lsa, boshqalarida ishorat bilan bayon qilingan. Ibn Xaldun kabi ayrim olimlar bu haqda kelgan hadislarni zaif deb hisoblashgan.

Diniy manbalarda u haqida quyidagicha bayon qilinadi: “Oxirzamon yaqinlashganda Makka va Madina hududida Imom Mahdiy paydo bo‘ladi. Ya'ni bir xalifa vafot etib, musulmonlar orasida tartibsizlik yuzaga keladi. Madinalik bir kishi Makkaga qochib boradi. Makkalik bir guruh odam uni kutib olib, o‘zi istamagan holda Rukn va Maqom o‘rtasida unga bay'at beradi. Ana shu kishi Imom Mahdiy bo‘ladi.

U Payg‘ambarimizning (унга Аллоҳнинг салавоти ва саломи бўлсин) oilasidan, Hazrati Ali va Fotima onamizning o‘g‘li Imom Hasan naslidan (Аллоҳ улардан рози бўлсин) bo‘ladi. "Mahdiy" so‘zi “to‘g‘ri yo‘lda bo‘lgan va boshqalarni ham to‘g‘ri yo‘lga boshlovchi” degan ma'noni anglatadi.

Imom Mahdiyga qarshi Shom (Suriya) tomonidan lashkar yuboriladi. Makka va Madina oralig‘ida ularni yer yutadi. Bu xabarni eshitgan Shom va Iroqning ulug‘ kishilari kelib, Imom Mahdiyga bay'at qiladi.

Keyin u Quddus masjidiga boradi. O‘sha paytda Dajjal ham keladi. Orqasidan Shomning Damashq shahridagi sharqiy minoraga Iso (унга Аллоҳнинг саломи бўлсин) payg‘ambar tushadi. U ham Dajjal bilan jang qilish uchun keladi. Ikkalasi birga Dajjalni o‘ldiradi. So‘ngra namoz o‘qilganda Iso payg‘ambar Imom Mahdiyini imomlikka chiqaradi (Sharh kitob al-fiqh al-akbar, 191-192-betlar).

Imom Mahdiy odamlar orasida Payg‘ambarimizning (унга Аллоҳнинг салавоти ва саломи бўлсин) sunnatini yoyadi. Shu tariqa Islom dini yer yuzida to‘liq qaror topadi. Imom Mahdiy saxiy inson bo‘ladi. U bor mol-dunyosini xalq orasida tarqatadi, uni sanamaydi. U yetti yil xalifa bo‘ladi. Vafot etganida musulmonlar uning janozasini o‘qiydi.”

Ahl as-sunna val-jamoa vakillari Imom Mahdiy chiqishiga ishonadi. Uning chiqishini inkor qilgan odamni kofir deb hisoblamaydi.

Tayyorladi: Hasan AMANKUL,

“Minara” gazetasi, №22, 2021 yil