Payg‘ambarni tushingizda ko‘rsangiz nima bo‘ladi?

Payg‘ambarimizni (u zotga Allohning salovoti va salomi bo‘lsin) tushingizda ko‘rish mumkin bo‘lgan narsa. Bu haqda bir nechta hadislar ham kelgan. Umuman olganda, Allohning elchisini tushda ko‘rishning ko‘plab foydalari bor. Ularning ayrimlariga to‘xtalib o‘tamiz.

1. Kim tushida Payg‘ambarimizni (u zotga Allohning salovoti va salomi bo‘lsin) ko‘rsa, demak bu – rost tush. Payg‘ambarimizni (u zotga Allohning salovoti va salomi bo‘lsin) tushida ko‘rgan odam aslida ham Payg‘ambarimizni ko‘rgan bo‘ladi. Chunki shayton har qanday suratga kira olsa-da, Alloh elchisining qiyofasiga kira olmaydi. Bu haqda hadislarda: «Kim meni tushida ko‘rsa, albatta u meni ko‘rgan. Chunki shayton mening qiyofamga kira olmaydi», – deb aytilgan. Biroq ba’zi olimlar Payg‘ambarimizni (u zotga Allohning salovoti va salomi bo‘lsin) sifatlari bilan ko‘rsa, ana shunda bu haqiqiy tush bo‘ladi, deyishgan.

2. Tushida ko‘rgan odam uni o‘ngida ham ko‘radi. Hadisda: «Kim meni tushida ko‘rgan bo‘lsa, meni o‘ngida ham ko‘radi yoki meni o‘ngida ko‘rgandek bo‘ladi», – deb aytilgan. Ammo bu ham olimlar o‘rtasida bahsli masala. Ba’zi olimlar Payg‘ambarimizning (u zotga Allohning salovoti va salomi bo‘lsin) nurini ko‘radi desa, boshqalari Qiyomatda ko‘radi, deyishadi.

3. Kim Payg‘ambarimizni (u zotga Allohning salovoti va salomi bo‘lsin) tushida ko‘rsa, uning hayotining oxiri yaxshi bo‘ladi. Shuningdek, agar Payg‘ambarimizni (u zotga Allohning salovoti va salomi bo‘lsin) tushida ko‘rgan odam kambag‘al bo‘lsa, Alloh Taolo uning rizqiga baraka beradi. G‘amgin odamning g‘ami ketadi. Kasal odam shifo topadi va hokazo, bundan boshqa ham ko‘plab foydalari bor. Lekin tushida Payg‘ambarimizni (u zotga Allohning salovoti va salomi bo‘lsin) ko‘rgan odam sahoba hisoblanmaydi.

Alloh elchisini (u zotga Allohning salovoti va salomi bo‘lsin) tushda ko‘rish – katta ne’mat va katta baxt. Alloh Taolo Payg‘ambarimizni bu dunyoda ham, oxiratda ham ko‘rishdan mahrum qilmasin! Alloh Taolo Payg‘ambarimizni (u zotga Allohning salovoti va salomi bo‘lsin) tushida ko‘rish baxtini har bir musulmonga nasib qilsin!

Medet QURMASHULI

“Imon” jurnali, №9, 2024 yil