Payg'ambar muhrining qanday bo'lgan?

Imom at-Termiziy "Ash-Shamail al-Muhammadiya" asarida Payg'ambarimizning (unga Allohning salovoti va salomi bo'lsin) tashqi ko'rinishi haqida so'z yuritilar ekan, ikki kuragi orasida payg'ambarlik muhrining bo'lgani zikr qilinadi. Payg'ambarlik muhr degani — kaptarning tuxumidek kattalikda, rangi qizil, yumaloq tana go'shtidan o'sib chiqqan bir bo'lak go'sht edi. Bu muhr Payg'ambarimizning haqiqiy payg'ambar ekaniga dalil bo'lgan.

Barcha olimlar bu masalada ittifoq qilgan. Lekin "Payg'ambarlik muhr Payg'ambarimiz tug'ilganida bo'lganmi?" yoki "Keyinroq paydo bo'lganmi?" degan savollar olimlar o'rtasida bahsli masala bo'lgan. To'g'rirog'i, bu muhr Payg'ambarimizning (unga Allohning salovoti va salomi bo'lsin) ko'kragi yorilib, yuragidagi quyuq qon olib tashlanib, zamzam suvida yuvilib, qayta joyiga solingan paytda ikki kuragi orasiga bosilgan. Ikki kurak orasida deyilsa-da, muhaqqiq olimlar bu muhr chap kurakka yaqin, yurak sohasida joylashganini aytishgan.

Bu muhr avvalgi tushirilgan kitoblarda ham Payg'ambarimizning (unga Allohning salovoti va salomi bo'lsin) sifatlari qatorida zikr qilingan. Ahli kitob orasidagi bilimdon kishilar bu muhrni yaxshi bilgan. Ularning ba'zilari shu belgini ko'rib, iymon keltirib musulmon bo'lishgan. Bu payg'ambarlik muhriga oid bir necha hadislar kelgan. Ularning ayrimlariga to'xtalsak:

1. Sayb ibn Yazid (Alloh undan rozi bo'lsin) rivoyat qiladi: "Meni xolam Payg'ambarimizning huzuriga olib bordi va: 'Ey Allohning elchisi! Jiyanim kasal bo'lib yuribdi', dedi. Shunda Payg'ambarimiz boshimni silab, menga duo qildi. Keyin tahorat oldi. Men tahoratdan qolgan suvni ichdim va orqasiga o'tib turdim. O'shanda ikki kuragi orasidagi muhrga ko'zim tushdi. U bedana tuxumidek kattalikda edi"

   Bu hadislarga sharhlarda Sayb ibn Yazid (Alloh undan rozi bo'lsin) Payg'ambarimizning (unga Allohning salovoti va salomi bo'lsin) duosi barakoti bilan 94 yil umr ko'rgan va belini bukmay vafot etgani aytiladi.

2. Jabir ibn Samura (Alloh undan rozi bo'lsin) rivoyat qiladi: "Payg'ambarimizning ikki kuragi orasidan kaptarning tuxumidek qizil muhrni ko'rdim", degan.

3. Burayda (Alloh undan rozi bo'lsin) rivoyat qiladi: "Payg'ambarimiz (unga Allohning salovoti va salomi bo'lsin) Madinaga ko'chib kelganida, Salmon Forsiy (Alloh undan rozi bo'lsin) Payg'ambarimizning huzuriga kelib, dasturxonga yangi pishgan xurmo mevalarini qo'ydi. Payg'ambarimiz: 'Ey Salmon, bu nima?' deb so'radi. Salmon: 'Bu siz va sahobalaringiz uchun sadaqa', dedi. Payg'ambarimiz: 'Uni olib ket, biz sadaqa yemaymiz', dedi. Ertasiga yana xurmo olib kelib, Payg'ambarimiz oldiga qo'ydi. 'Bu nima?' deb so'raganda, 'Bu sizga sovg'a', deb javob berdi. Shunda Payg'ambarimiz sahobalariga: 'Qo'l uzatib, xurmodan olinglar', dedi. Keyin orqasidagi muhrni ko'rib, Salmon (Alloh undan rozi bo'lsin) iymon keltirdi.

Bu Payg'ambarimizning belgisini Salmon Forsiyga uning rohib ustozlari aytgan edi. U Hijozdan bir payg'ambar chiqishini, u sovg'ani qabul qilib, sadaqani olmaydiganini va ikki kuragi orasida muhr bo'lishini aytgan edi. Salmon Payg'ambarimiz sadaqani yemaganini ko'rib, bu payg'ambarlikning birinchi belgisi ekanini bildi. Xurmoni sovg'a deb oldiga qo'yganida, undan tatib ko'rganini ko'rib, ikkinchi belgi ekanini bildi. Nihoyat, ikki kuragi orasidagi muhrni ko'rib, iymon keltirdi. Xulosa qilib aytganda, bu muhr Payg'ambarimizning haqiqiy payg'ambar ekaniga dalildir. Chunki u avvalgi payg'ambarlar tushirilgan kitoblarda ham zikr qilingan. Bu muhr chap kurakka yaqin, yurak sohasida joylashgan. Kattaligi kaptarning tuxumidek, ko'pchilik olimlarning aytishicha, rangi terisining rangidek bo'lgan. Bu muhr ko'pchilik olimlarning aytishicha, Payg'ambarimizning ko'kragi yorilib, yuragidagi quyuq qon — ya'ni shaytonning ulushi olib tashlangach, yuragi ilohiy hikmat bilan to'ldirilgach, shu muhr bosilgan. Alloh taolo biluvchi!

Medet QURSHAQOV,

"Imon" jurnali, №9, 2023 yil