QURBON SOYISHNING HIKMATI NIMA?

Qurbon so‘yish ibodati bandani oxiratda mukofot va katta savoblarga erishtiradi.

Payg‘ambarimiz (unga Allohning salovoti va salomi bo‘lsin) dedilar:

ما عمل ابن آدم يوم النحر أحب إلى الله من إهراق الدم، وإنه ليؤتى يوم القيامة بقرونها وأشعارها وأظلافها، وإن الدم ليقع من الله بمكان قبل أن يقع بالأرض، فطيبوا بها نفسا

"Inson bolasi uchun Qurbon hayiti kuni (qurbon so‘yib) qon oqizishdan ko‘ra Allohga yaqinlashtiradigan boshqa sevimli amal yo‘q. Qurbonlik hayvon qiyomat kuni shoxlari, tuyoqlari va junlari bilan olib kelinadi. Uning qoni hali yerga tushmasidan oldin Alloh huzurida yuqori maqomga yetadi. Shuning uchun qurbonliklaringizni xushnudlik bilan so‘yinglar" [1] – deganlar.

Boshqa bir hadishda:

بكل شعرة حسنة

Qurbonlikka so‘yilgan hayvonning har bir tukiga savob yozilishi aytilgan [2].

Qurbon so‘yish Alloh bergan ne’matlarga shukr qilishni bildiradi. Allohning ne’matlari juda ko‘p, ularni sanab adog‘iga yetib bo‘lmaydi. Alloh taolo Qur’onda shunday deydi:

وَإِنْ تَعُدُّوا نِعْمَةَ اللَّهِ لا تُحْصُوهَا

"Agar Allohning ne’matini sanasangiz, adog‘iga yetolmaysizlar" [3]. Iymon, ibodat, eshitish, ko‘rish, mol-dunyo, farzand – bularning barchasi Allohning ne’matlaridir. Bu ne’matlar davomli bo‘lishi uchun ularga shukr qilish lozim. Alloh bergan ne’matga shukr qilishning bir yo‘li – Alloh yo‘lida mol-dunyoni sarflashdir. Qurbonlik so‘yish – Allohga shukr qilishning bir ko‘rinishi.

Qurbon so‘yish orqali Allohning amriga bo‘ysunishni va sabrni o‘rganamiz. Ibrohim va Ismoil payg‘ambarlarning Alloh amriga bo‘ysunganlari va mustahkam turganlari voqeasini eslasak, ularning Allohga bo‘lgan itoati va muhabbati hamma narsadan ustun bo‘lganini ko‘ramiz. Bu esa bizni ham Alloh amriga bo‘ysunishga va sabrli bo‘lishga undaydi.

Qurbonlik go‘shtidan oilasiga, yaqin qarindoshlariga, qo‘shnilariga, do‘stlariga va muhtojlarga ulashish musulmonlar orasida mehr-oqibat va do‘stlikni oshiradi. Bir hayvonini so‘yib, kambag‘al va muhtoj birodarlariga yordam berish orqali inson yomon xulqlarini birodarlik, saxovat, kamtarlik kabi yaxshi fazilatlar bilan almashtiradi. Shariatimizda bunday amallar qilish talab etiladi va yaxshi ish hisoblanadi.

• [1] Termiziy rivoyati.

• [2] Ibn Moja, №3118.

• [3] "Ibrohim" surasi, 34-oyat.