TANAGA TATU QILDIRISH MUMKINMI?

Qadimgi Yunoniston va Rimda qullar va jinoyatchilarni maxsus tatular orqali ajratib olishgan. Osiyo, Afrika va Amerikadagi ayrim qadimiy xalqlar va qabilalar ham tanalariga turli naqsh va suratlar tushirishgan. Hozirgi kunda yoshlar orasida tanaga igna bilan yozuv yoki surat (tatu) tushirish urf bo‘lib bormoqda.

Tatu – bu teri ostiga bo‘yoqlar yuborish orqali chiziladigan yozuv va suratlardir. Islom dinida tanaga tatu qilish taqiqlanadi. Chunki Abdulloh ibn Umar (Alloh undan rozi bo‘lsin) rivoyat qilgan hadislarda shunday deyiladi:

«Payg‘ambarimiz (u zotga Allohning salovoti va salomi bo‘lsin) o‘ziga va boshqalarga soxta soch qo‘ygan, o‘ziga va boshqalarga tatu qilganlarni la’natlagan», – deyilgan (Buxoriy, Muslim).

Bundan tashqari, zamonaviy ilmiy tadqiqotlar ham tatuning sog‘liqqa jiddiy zarar yetkazishini isbotlagan. Masalan, tatu qilishda ishlatiladigan ignalarning toza bo‘lmasligi yoki studiyalarning sanitariya talablariga javob bermasligi turli yuqumli kasalliklarni keltirib chiqaradi.

Ikkinchidan, bo‘yoqlarning tarkibida qo‘rg‘oshin, mishyak va boshqa zaharli moddalar bo‘lishi mumkin. Ular insonni xavfli saraton kasalliklariga duchor qilishi ehtimoli bor. Zararli bo‘yoqlar hatto inson gen tizimini ham asta-sekin zararlashi mumkin. Tatu tufayli odamlar teri saratoni, ekzema va allergiya kabi kasalliklarga ko‘proq chalinadi.

Demak, tanaga tatu qilish nafaqat xalqimizning qadriyat va dunyoqarashiga zid, balki har bir inson salomatligi uchun ham xavfli ekanini chuqur anglashimiz kerak. Shariatimizda har bir ongli inson o‘z salomatligini asrashga mas’uldir.

Biroq, ba’zi olimlarning fikricha, quyidagi holatlargina tanaga yozuv yoki surat tushirishga ruxsat beriladi:

1. Naqsh yoki surat tanaga singib qolmasligi, vaqt o‘tishi bilan o‘chib ketishi kerak;

2. Yozuv suvning teriga tegishiga to‘sqinlik qilmasligi lozim;

3. Uyatsiz yozuv va suratlar bo‘lmasligi kerak;

4. Suratda yomon shiorlar, soxta mafkura yoki adashgan oqimlarning belgisi bo‘lmasligi lozim;

5. Chizmada tirik mavjudotning surati bo‘lmasligi kerak;

6. Tanaga Alloh Taoloning ismlari yoki Qur’on oyatlari yozilmasligi lozim;

7. Yozuv avrat (uyat) joylarga qo‘llanmasligi kerak (Fataavo shar’iya, shayx Ahmad Sharif an-Nasag‘oniy).