Tarovih namozini jamoat bilan o‘qishning hukmi nima?

Nafl namozlarni yolg‘iz o‘qish afzal bo‘lsa-da, tarovih namozini jamoat bilan o‘qish Rasulullohning (s.a.v.) amaliyoti bilan sobitdir. Rasululloh (s.a.v.) bir necha bor tarovih namozini jamoatga o‘qib berganlar, biroq keyinchalik farz bo‘lib qolishidan xavotirlanib, jamoatga o‘qitishni tark etganlar (Buhârî, Salâtü’t-terâvîh, 1 [2012]; Muslim, Salâtü’l-müsâfirîn, 177-178 [761]). Hazrat Umar (r.a.) xalifa bo‘lganlarida, odamlar tarovih namozini tarqoq holda o‘qiyotganlarini ko‘rib, uni yana jamoat bilan o‘qish ma’qulroq deb hisoblaganlar va sahobalar bilan maslahatlashib, bu namozni yana jamoat bilan o‘qish amaliyotini boshlab berganlar. Odamlar bu namozni ixlos bilan o‘qiyotganlarini ko‘rib, “Qanday yaxshi odat bo‘ldi”, deb mamnuniyatlarini bildirganlar (Buhârî, Salâtü’t-terâvîh, 1 [2010]). Hazrat Ali (r.a.) esa bu amaliyot sababli: “Umar masjidlarimizni tarovihning fayzi bilan nurlantirgani kabi, Alloh ham Umar qabrini shunday nurlantirsin”, deb duo qilganlar (Ibn Asâkir, Târîhu medîneti Dımaşk, 44/280 [9808]).

Manba: T.C. Diyanet İşleri Başkanlığı, Din İşleri Yüksek Kurulu