Tasbeh namozi qanday o‘qiladi?

Ba’zi hadis kitoblarida tasbeh namozining tartibi haqida rivoyatlar bor. Rasululloh (s.a.s.) amakilari Abbosga (r.a.): “Ey amaki, sizga o‘nta foydasi bor narsani o‘rgataymi; agar buni qilsangiz, gunohlaringizning birinchisi-oxiri, eskisi-yangisi, bilmay qilganingiz-bilib qilganingiz, kichigi-kattasi va yashirin qilganingiz-oshkora qilganingiz kabi o‘nta turli gunohingizni Alloh kechiradi.” deb, ushbu namozni tavsiya qilgan va o‘rgatganlar; Hazrati Abbos esa, buni har kuni qila olmaymiz, deganlarida, Payg‘ambarimiz bu namozni haftada bir, oyda bir, yilda bir yoki umrda bir marta o‘qish ham yetarli bo‘lishini aytganlar. (Abu Dovud, Tatavvu‘, 302 [1297]; Ibn Moja, Iqomatus-salavat, 190 [1387])

Tasbeh namozi to‘rt rakatdan iborat bo‘lib, quyidagicha o‘qiladi: “Alloh rizoligi uchun tasbeh namozi o‘qishga” deb niyat qilinadi va namoz boshlanadi. Subhanaka duosidan so‘ng 15 marta “Subhanallohi val-hamdulillahi va la ilaha illallohu vallohu akbar” deyiladi. So‘ngra a’uzu basmala aytiladi, Fotiha va sura o‘qilgandan keyin yana 10 marta “Subhanallohi val-hamdulillahi va la ilaha illallohu vallohu akbar” deyiladi. Bu tasbeh ruku’ga borganda 10 marta, ruku’dan turganda 10 marta, birinchi sajdada 10 marta, sajdadan turganda 10 marta, ikkinchi sajdada 10 marta aytiladi. Shunday qilib, har bir rakatda 75 ta tasbeh aytiladi. Ikkinchi rakatga turganda ham avval 15 marta tasbeh o‘qiladi, so‘ng basmala aytilib, Fotiha va sura o‘qilib, 10 marta tasbeh aytiladi. Qolgan rakatlar ham shu tartibda takrorlanadi va shu tariqa 4 rakat to‘liq o‘qilib, jami uch yuz marta tasbeh aytiladi.

Tasbeh namozi karohat vaqtlarida o‘qilmaydi. (Ibn Obidin, Raddul-muhtar, 2/27) Tasbeh namozida sahv sajdasini talab qiladigan holat bo‘lsa, sahv sajdasi odatdagidek qilinadi, o‘sha sajdalarda tasbeh namoziga xos tasbihat aytilmaydi. (Tahtaviy, Hashiya, 361)

Manba: T.C. Diyanet İşleri Başkanlığı, Din İşleri Yüksek Kurulu