Vitr namozi nima, qanday o‘qiladi?

Vitr namozi — bu xanafiy mazhabiga ko‘ra, xufton namozidan keyin o‘qiladigan, uch rakatli vojib namozdir. Vitr namozining har bir rakatida Fotiha surasi va undan so‘ng bir sura yoki bir necha oyat o‘qiladi. Ikkinchi rakat oxirida o‘tiriladi va faqat tahiyyot duosi o‘qiladi. Uchinchi rakatda qiroat (Fotiha va undan so‘ng bir sura yoki bir necha oyat) tugagach, qo‘llar quloqlargacha ko‘tarilib takbir aytiladi va qo‘llar bog‘langach, qunut duolari o‘qiladi. Ushbu vojib namoz xufton namozi o‘qilgandan so‘ng, bomdod namozining vaqti kirguncha istalgan vaqtda o‘qilishi mumkin (qarang: Ebû Dâvûd, Tefrî‘u ebvâbi’l-vitr, 1 [1418]; İbnü’l-Hümam, Fethu’l-kadîr, 1/423-426).

Uyg‘onishga ishonchi bor kishi vitr namozini tun oxirida, ya’ni bomdod vaqtidan biroz oldin o‘qishi afzalroqdir (Muslim, Salâtü’l-müsafirîn, 162-163 [755]). Ammo uyg‘onolmaslikdan xavotirlangan kishi vitr namozini uxlamasdan oldin o‘qib qo‘yishi ma’qul bo‘ladi. O‘z vaqtida o‘qilmagan vitr namozini keyin qazo qilish vojibdir (İbnü’l-Hümâm, Fethü'l-kadîr, 1/426). Boshqa mazhablarga ko‘ra esa vitr namozini o‘qish sunnat hisoblanadi (İbn Kudâme, el-Muğnî, 2/117).

Manba: T.C. Diyanet İşleri Başkanlığı, Din İşleri Yüksek Kurulu