YOGA BILAN SHUG'ULLANISH TO'G'RIMI?

Yoga – bu qadimgi Hindistonda paydo bo'lgan, psixologik, ruhiy va jismoniy mashqlarni o'z ichiga olgan tushuncha. Yogada asosiy maqsad – tana va ruh uyg'unligiga erishish, jismoniy mashqlar orqali ruhiy salomatlik va tetiklikka erishishdir.

Meditatsiya esa, ba'zan baxtga erishishning yagona yo'li sifatida taqdim etiladi. Yoga va meditatsiya induyizm va buddizmning ajralmas qismi bo'lib, ularning barcha unsurlari reinkarnatsiya e'tiqodi bilan sug'orilgan. Bu qarashlar islomiy aqidaga zid. Yogaga doir "Al-yuga fi mizan al-naqd al-ilmiy" kitobida yoga bilan shug'ullanish to'g'ri emasligi haqida bir nechta sabablar keltiriladi.

• Diniy e'tiqodga zid. Chunki unda Alloh Taologa shirk keltirish, ya'ni quyoshga sajda qilish va uning nomlarini takrorlash mavjud.

  "(Ey Muhammad!) Menga faqat Allohga ibodat qilish va Unga hech narsani sherik qilmaslik buyurildi. Men faqat Unga da'vat qilaman va Unga qaytaman", de, – deyiladi («Ra'd» surasi, 36-oyat).

  Yana bir oyatda shunday deyiladi: "Shubhasiz, senga ham, sendan oldin kelgan payg'ambarlarimizga ham: 'Agar Allohga boshqalarni sherik qilsang, qilgan barcha (yaxshi) amallaring behuda ketadi. Va, albatta, ziyon ko'ruvchilardan bo'lasan', deb vahiy qilingan edi" («Zumar» surasi, 65-oyat).

• Butparastlarga o'xshashlik.

  Payg'ambarimiz (u zotga Allohning salovoti va salomi bo'lsin): "Kim bir qavmga o'xshasa (ularga ergashsa), demak u o'shalardan biridir", – degan (Ahmad, Abu Dovud, Tabaroniy).

• Ba'zi mashqlar, masalan, noodatiy va noqulay o'tirish, uzoq vaqt quyoshda turish, ko'zni uzmay quyoshga qarash va hokazo, inson salomatligi va psixologik holatiga zararli.

  Payg'ambarimiz (u zotga Allohning salovoti va salomi bo'lsin): "O'ziga va boshqalarga zarar yetkazish mumkin emas", – degan (Ahmad, Ibn Moja).

• Vaqtni behuda sarflaydi. Bundan tashqari, bu dunyoda zarar va yo'qotish, oxiratda esa halokat va umidsizlik olib keladi.

  Payg'ambarimiz (u zotga Allohning salovoti va salomi bo'lsin): "Inson qiyomatda to'rt narsa haqida so'ralmaguncha joyidan jilmaydi: umri va uni qanday o'tkazgani, ilmi va uni qanday ishlatgani, mol-dunyosi va uni qayerdan topgani hamda qanday sarflagani, tanasi va unga qanday g'amxo'rlik qilgani", – degan (Tirmiziy).

Biroq, taqiqlangan diniy amallarni bajarmaslik sharti bilan, sport sifatida yoga bilan shug'ullanishga shariat ruxsat beradi. Lekin yoga orqali jismoniy va ruhiy salomatlikka erishmoqchi bo'lgan musulmon, islomdagi ibodatlar bundan ancha ustun ekanini unutmasligi kerak. Chunki namoz, zikr, ro'za kabi ibodatlar tanaga sog'liq, yurakka esa xotirjamlik beradi.

Qur'onda: "Yuraklar faqat Allohni zikr qilish bilan xotirjam bo'ladi", – deyiladi («Ra'd» surasi, 28-oyat).

Tayyorlagan Hasan AMANKUL

"Munara" gazetasi, №10, 2021 yil